Siglir tar il cuntegn

Header

cuntegn

Svizra Svizzers èn puspè pli cuntent cun la politica

Ils Svizzers èn pli cuntent cun la politica che pli baud, quai mussa la pli nova enquista da la plattafurma da cumparegliaziun Vimentis. En l'enquista actuala èn sulet anc 46% malcuntent u plitost malcuntent. Avant in onn era quai 53%.

audio
Mezdi: Vimentis - main glieud è malcuntenta cun la politica
ord Actualitad dals 20.02.2017.
laschar ir. Durada: 4 minutas 1 Secunda.

Il pli grond spazi d'agir vesan ils dumandads tar la politica d'asil. L'enquista da Vimentis è vegnida fatga avant la votaziun davart la refurma da la taglia sin las interpresas III.

36% da las persunas dumandadas han inditgà d'esser cuntent u plitost cuntent cun la politica. 18% èn neutrals.

Enquista cun > 20'000 persunas

Avrir la box Serrar la box

L'enquista online è vegnida fatga dals 3.10.2016 fin ils 17.12.2016 cun 21'337 persunas. Cunquai ch'enquistas online n'èn per regla betg represchentativas èn vegnidas evaluadas las provas da controlla sin fundament da criteris furmaziun, schlattaina e regiun. L'enquista actuala è gia la 13avla davart l'avegnir politic da la Svizra.

Sco quai che Vimentis communitgescha datti grondas differenzas tranter ils giuvens (ch'entran gist en la vita professiunala) ed ils vegls (che van en direcziun da la pensiun). Dals giuvens da 15 fin 24 onns èn 48% cuntent u plitost cuntent, da las persunas da 55 fin 64 onns èn 31% cuntent cun la politica. Il pli grond basegn d'agir vesan ils dumandads en la politica d'esters, la politica d'asil e la sanadad.

Quitads davart l'AVS

Adina dapli quitads fa als carstgauns en la Svizra l'AVS. Tenor Vimentis tema per l'emprima giada ina maioritad relativa che lur rentas d'AVS n'èn betg pli segiras. 46% han inditgà che lur renta na saja betg segira, per 33% è la renta dentant anc adina segira.

RR novitads 09:00

Artitgels legids il pli savens