A Losanna ha la dretgira cirquitala declerà il concurs da l'interpresa da textilias Switcher. Quella aveva gia dapi in temp problems finanzials. Gia il december era vegnì fatg la dumonda per ina procedura da concurs. L'emna passada aveva il sindicat Unia lura annunzià che Switcher na survegnia betg pli rauba dals furniturs e che las pajas da l'avrigl na sajan betg vegnidas pajadas. Glindesdi vegnan ils bun 40 collavuraturs infurmads en chaussa.
Tenor il fundatur da Switcher Robin Cornelius saja la fatschenta daventada pli e pli intransparenta, ha el ditg envers SRF Online. L’onn passà aveva Cornelius sez instradà la procedura da concurs dal december passà. Actualmain ha el anc 14 pertschient da las aczias da Switcher.
Tuts 40 collavuraturs vegnan relaschads
Ils 40 collavuraturs duain vegnir relaschads, la sedia da la firma vegn serrada, rapportan medias da la Svizra franzosa. Tuttina spera il fundatur Cornelius da pudair reanimar Switcher. La valita da Switcher sajan la glieud, la rait, ils vendiders, ils squitschaders, las butias ed ils furniturs. Tuts sajan pronts ed i possia cuntinuar aifer paucas emnas, uschia Cornelius. El sez porschia gugent ses maun per cumenzar danovamain. Daners per far novas investiziuns n’haja el dentant betg.
Switcher aveva sa fatg in num cun la producziun persistenta da vestgadira e la collavuraziun cun organisaziuns nunguvernamentalas.
RR novitads 15:00