Tgira dovra dapli persunal e temp

Al congress da tgira a Berna s’inscuntran passa 1500 tgirunzas e tgirunz per discutar la situaziun da la tgira en Svizra. Sper l’iniziativa da tgira èn era las cundiziuns da lavur in grond tema.

Tgirunza sper in letg. Bild in Lightbox öffnen.

Legenda da maletgs: En Svizra mancan 10'000 tgirunzas e tgirunz. Keystone

Tgirar persunas malsaunas e mirar ch'ellas vegnian puspè en gamba ni possian supportar meglier lur malsognas, quella clamada haja grond potenzial, di Helena Zaugg, la presidenta da l’Associaziun svizra da las tgirunzas e dals tgirunz. La populaziun vegnia adina pli veglia ed adina dapli persunas pateschian da malsognas cronicas. Quai haja per consequenza ch'adina dapli persunas dovrian e sajan dependentas da buna tgira.

«  Buna tgira pretenda bler persunal ch’è era scolà sin differents nivels. Nus ans faschain dentant quitads perquai che nus scolain memia pauc persunal. »

Helena Zaugg
presidenta da la SBK

Mancanza da persunal da tgira

Las calculaziuns da l’Uffizi federal da sanadad dattan raschun a Zaugg. Enfin l'onn 2025, pia en 8 onns, dovra la Svizra da quai da 40'000 novas tgirunzas e tgirunz. Ma la tendenza sin il martgà da lavur mussia en la fallida direcziun, di Zaugg. Enstagl da scolar dapli persunas manchian gia uss circa 10'000 tgirunzas e tgirunz en Svizra. Per la presidenta da l’associaziun è perquai cler, ì dovra urgentamain dapli plazzas da scolaziun ella tgira. Ma quai na tanschi anc betg. Ins stoppia era mirar che las tgirunzas ed ils tgirunz restian era ella clamada.

«  «Sch’ins ha memia pauc persunal lura han ins memia pauc temps. E lura èn ins surchargiads e lura bandunan ins la clamada. Quai sto sa midar. Nus stuain crear cundiziuns da lavur che pussibiliteschan a las tgirunzas ed als tgirunz da restar ella clamada.» »

Helena Zaugg
presidenta da la SBK

Las consequenzas che la mancanza da persunal scolà ella tgira po avair vesi ins gia oz. Cunzunt las chasas d’attempads e da tgira hajan difficultads da chattar avunda persunal e la fin finala sentian quai ils pazients.

Iniziativa da tgira sin buna via

Per megliurar la situaziun da lavur hajan els lantschà l'entschatta da l’onn l'iniziativa da tgira. Quella vul tranter auter ch'ils chantuns e la Confederaziun promovian la furmaziun da novas persunas da tgira, legheschian la cumpatibilitad da lavur e famiglia e procurian era per pussibilitads da sa scolar vinavant. La chapientscha ed il sustegn ella populaziun sajan gronds, di Zaugg. Entaifer gnanc in mez onn hajan els gia rimnà passa la mesadad da las 100'000 suttascripziuns necessarias.

RR actualitad 17:00