Swiss Olympic vul sviluppar in project che vegn purtà da l’entir pajais. Ina da las finamiras principalas duai esser ch’ina candidatura duai er avair ina schanza reala per la surdada il 2019. Per survegnir il consentiment sin plaun naziunal sto ina candidatura ademplir las suandontas pretaisas da Swiss Olympic:
- La «citad ospitanta» e la regiun correspundenta sco er l'entira Svizra ston pudair profitar fitg da la candidatura.
- La candidatura sto esser persvadenta ed attractiva, uschia ch'ella survegn ina maioritad da las vuschs dals commembers dal Comité olimpic internaziunal tar la surdada il 2019.
3 projects marschan
lls ultims mais è vegnì discutà da 3 projects per candidaturas: in vegn da circuls d'economia ord il Grischun, in segund vegn ord il Vallais sut l'egida dal president dal FC Sion Christian Constantin ed il terz d'ina cuminanza d'interess enturn l'inschignier da Gstaad Kurt Iseli.
Consentiment dal pievel avant la decisiun finala
Detagls davart la procedura da nominaziun sin plaun naziunal vegnan annunziads ils 20 d'avrigl a Losanna. Aifer in mais ston las citads u regiuns pertutgadas lura decider sch'ellas vulan sa participar uffizialmain a questa procedura. Tgenin dals projects che duai lura vegnir inoltrà al Comité olimpic internaziunal, vul Swiss Olympic pir decider suenter las votaziuns dals pievel.
Team da concept grischun beneventa la decisiun
L'organisaziun tetgala da l'economia grischuna ed il team da concept per ina candidatura grischuna entrun Andreas Wieland beneventan la decisiun da Swiss Olimpic da sustegnair gieus l'onn 2026. Tenor il team da concept grischun haja la candidatura communabla dal Grischun ensemen cun il chantun Turitg bunas schanzas d'ademplir las premissas da Swiss olimpic.
Tge schanzas avess ina candidatura svizra?
Ina candidatura svizra avessi bunas schanzas da persvader il comité olimpic internaziunal, manegia Jörg Schild, il president da Swiss Olimpic. L'infrastructura saja gia avant maun, las relaziuns sajan bellezza, ins possia propi transponer las novas ideas dal comité olimpic internaziunal.
Ultra da quai sajan ils commembers dal comité olimpic internaziunal plaunsieu unfis da trasora avair gieus olimpics u occurrenzas pli grondas mo pli en il Proxim Orient, en l'Orient Central u en l'Orient Extrem, nua ch'i na dovria naginas votaziuns dal pievel.
Era Andreas Wieland, manader da project da la candidatura grischuna, è da buna speranza. Els emprovian da realisar las novas pretensiuns dal comité olimpic internaziunal, il Grischun possia ir ordavant cun il bun exempel. Wieland vesa la candidatura sco project da piunier, gieus pli modests e persistents.
RR novitads 20:00