Siglir tar il cuntegn

Header

audio
Avant l'appartement a El Gouna posseda Samih Sawiris in appartement gist dasper il port.
RTR, Sabrina Bundi
laschar ir. Durada: 40 minutas 31 Secundas.
cuntegn

Happy Birthday Samih Sawiris

Samih Sawiris, l'investur e milliunari egipzian che bajegia ad Andermatt quasi in nov vitg è um da fatschenta, è cosmopolit, è nunpolitic ed è cristian coptic. Ed el ha laschà vegnir a café tar el a chasa, per ina marella ch'emprova da mussar el en sias differentas rollas.

Download

Samih Sawiris tutga tar ina da las pli ritgas famiglias d'interprendiders da l'Egipta. El è il figl mesaun dal patriarc Onsi Sawiris, che ha fundà en ils onns enturn il 1950 la firma da bajegiar Orascom, e da Yousriya Loza Sawiris, anteriura commembra dal parlament egipzian. Er ils frars Nassef e Naguib èn interprendiders. Naguib en la branscha da telecommunicaziun, Nassef en quella da bajegiar, sco il bab. E Samih Sawiris è sa spezialisà sin il turissem.


Far cun «legos» in zic pli gronds
Andermatt è be in da numerus projects ch'el bajegia. Ses project da parada è la citad cumplettamain artifiziala El Gouna a la costa da la mar cotschna. Là, nua che quai era anc avant 26 onns nagut auter che desert ha Samih Sawiris bajegià hotel per hotel, villa per villa, restaurant per restaurant, chasa per chasa. Ina entira citad cun entant 25'000 abitants. Cun scola, universitad, apoteca, baselgia, moschea e tut quai ch'ina citad dovra. Er Samih Sawiris posseda in appartament a El Gouna. En il port da El Gouna è sia jacht parcada. E sin la jacht raquinta Samih Sawiris da sia uffanza, tranter auter, ch'el vuleva schon dad uffant daventar inschigner. «Jau hai schon d'uffant fatg fitg gugent cun legos e cun mecano - schon lura hai jau gì plaschair da bajegiar chaussas.»

«Politica? Na!»
Betg be l'uffanza e la relaziun cun ses geniturs e sia famiglia è stà in tema durant las intervistas, er tar temas forsa main agreabels ha Samih Sawiris dà insaquantas respostas. Per exempel vegn el confruntà cun critica envers sias fatschentas che han fatg lingias grossas. In auter tema è er, co quai è d'appartegnair ad ina minoritad cristiana - Samih Sawiris è Copt - en ina terra surtut muslima. Ubain el raquinta, tge ch'el ha fatg durant la primavaira araba en l'Egipta. Sawiris commentescha er la situaziun da l'Egipta uss suenter tut las midadas en la regenza - quai tuna lura quasi sco da tadlar tiers ad in politicher. Dentant ambiziuns politicas n'ha Samih Sawiris mai gì: «Avair massa daners plus anc pussanza quai na va betg», di el.

Dapli da «Marella»

Scrollar a sanestra Scrollar a dretga