China Crisis: «Wishful Thinking»

China Crisis, in num zunt curius per ina band. Però durant ils onns 80 era quai il pli normal. Fundaturs e cumponists da China Crisis eran il chantadur e keyboardist Gary Daly ed il ghitarrist Eddie Lundon, assistids d'in per cumpogns, tut musicists ord la scena da new wave enorm viva a Liverpool. Lur emprims pass èn stads plitost difficils, ed ils interess per lur musica eran pitschens. Dal 1983 han els però chattà la storta. Sin lur segund disc «Working with Fire and Steel – Possible Pop Songs Volume Two» è sta d'udir in toc da bellezza, ina chanzun en il stil da new wave pli madir, cun bler sintetisader ed ina melodia captivanta: «Wishful Thinking» che signifitga: illusiuns, speranzas, quai ch'ins vuless gugent. Quai è sta lur unic grond success, e la gronda part dals musicists han lura tschertgà bain spert autras sfidas, be Daly e Lundon han anc adina lur speranzas.