L'avrigl dal 1971 è cumparì «Sticky Fingers», in dals megliers discs dals Stones , e l'emprim disc tar lur agen label «Rolling Stones Records». Quai è er stà l'emprim senza lur ghitarrist Brian Jones, mort dus ons avant, pero cun ses successur Mick Taylor. Il toc il pli enconuschent da quel disc è «Brown Sugar», in dals pli bels dals Stones è «Wild Horses».
Quel avevan els già registrà dus onns avant, a l'entschatta da december dal 1969 durant lur lavurs per il disc «Let it bleed» en ils studios a Muscle Shoals/Alabama en ils Stadis Unids. Pervi d'ina cuntroversa da dretgs è «Wild Horses» pero cumparì pir il 1971, e blers crajan che la chanzun saja deditgada a Marianne Faithful, quella giada la marusa da Mick Jagger.
In auter fatg remartgabel che ha da far cun il lieu da registraziun en ils Stadis Unids: las gitarras accusticas da Keith Richards e Mick Taylor che dattan a questa ballada in'atmosfera americana, cun levs tuns da country-folk. Ina versiun cumplettamain en quel stil han fatg Gram Parson e ses «Flying Burrito Brothers» gia il 1970. Ils Stones han dà lur permiss e suenter èn els daventads buns amis.
