Ina gronda societad d'assicuranzas da vita en Svizra insista tar ses emploiads cun nums esters da curreger tals. Sch'il num finescha cun «–ic», saja meglier da midar en in num svizzer. Per fortuna han blers protestà encunter questa pretaisa! Midar l'agen num è giustifitgà mo, sche quai è in giavisch persunal.
Questa sonda sa scuntran a Sent quels ch'èn colliads cun il vitg ma n'abiteschan betg là – ils sturnels – cun las famiglias dals randulins, ils emigrants istorics. Gist tranter quels datti blers cas d'ina italianisaziun voluntara da lur nums. Forsa che betg tuts san ch'ils Ganzonis sa numnavan Gianzun. Ed era ils descendents dal refurmatur Bifrun avevan midà num en Biveroni.