«The Assembly» era ina band ch'è sa furmada il 1983, pero forsa fissi meglier da discurrer dad in project. Ils commembers, dus musicists talentads, han lura fatg be ina single, la chanzun «Never Never», ch'è rivada fin sin plazza 4 en la parada da la Gronda Britannia. In toc electronic, minimalistic, cun in pau sintetisaders e basta.
Davos quella chanzun eran il producent Eric Radcliffe ed il cumponist e chantadur Vince Clarke. Els vulevan far ina chanzun e laschar chantar quella divers chantadurs, in'idea interessanta e forsa er unica. L'emprima vusch ch'els han engaschà era quella da Feargal Sharkey, anteriur chantadur dals «Untertones», che ha lura fatg suenter carriera sco solist. Sia chanzun è restda l'unica registraziun da «Never Never». Clarke che aveva gia fatg musica cun «Yazoo» e «Depeche Mode» ha lura fundà la band «Erasure» e lavura enfin oz cun musica electronica.
