Zager & Evans: «In the year 2525»

Enconuschis quel grond hit da la fin dals onns 60? Dal temp dal progess tecnic ed industrial, dal temp da la missiun da Apollo 11 che sa platga sin la glina. Tut il mund era quella giada fascinà dal success dal quel project, e milliuns e milliuns umans han perseguità a Neil Armstrong che metta ses pes sin il trabant da la terra. Tant pli curius ch'ina chanzun che tematisescha il cuntrari, il privel dal progress per l‘umanitad, riva sin las emprimas plazzas da las paradas da hits dals Stadis Unids, Gronda Bretagna, Canada, Germania ed er en Svizra.
«In the year 2525» è ina chanzun dal duo nunenconuschent Zager & Evans che vegn da Lincoln, Nebraska. Denny Zager e Rick Evans l'avevan cumponida gia avant in per onns ed han rescuvert lur toc per lur concerts. Las reacziuns dal public èn stadas euforicas ed els han decis da registrar la chanzun cun text apocaliptic, cun visiuns stgiras d'umans che vegnan solitaris e da maschinas che surpiglian la controlla. A la fin da la chanzun èn ils umans svanids.
Er Zager ed Evans èn sparids. Lur «One hit wonder» vala sco il pli grond da tut ils temps, els lavuran uss sco magister da musica e vendader d'immobilias.