Els avevan il nas plain, na vulevan betg pli ir sin turnea, avevan adaina damain aspectaturs, dispita cun il manager e lura anc il caos a Manila nua ch'els èn vegnids attatgads. Dentant, enstagl da schliar la band han els creà l'alter ego, la Sgt. Peppers Lonely Hearts Club Band.
L'album che porta quai num è vegni producì cun la pli nova tecnica dal temp, ils texts èn vegnids pli profunds e sarcastics, insumma tut in zic pli surreal. E betg be la musica da l'album è vegnida festivada, mabain er il cover da l'album che mussa ils Beatles en uniformas giaglas entamez massa figuras da prominents vala sco art. Uss – 50 onns suenter la publicaziun – è lalbum vegni demontà e renovà da nagin auter che dal figl dal producent original da l'album. Giles Martin ha lavurà cun l'ovra da ses bab George Martin.