El pudess vegnir or d'in film da Quentin Tarantino: in galantum, elegant, en in vestgì nair, cun in'expressiun misteriusa e maliziusa en fatscha. L'Australian Nick Cave è pero in dals musicists, ils pli impurtants dals ultims 40 onns.
In da ses discs da renum ha tuttina da far cun tematicas morbidas: «Murder Ballads» dal 1996, in disc cun chanzuns e balladas plain istorgias d'amur e passiun, odi e crim. El ha collecziunà balladas tradiziunalas ed ha cumponì sez in pèr tocs da malfatschents e lumbarduns.
La pli bella è «Where the wild roses grow», in duet da Nick Cave e Kylie Minogue – il pèr ideal per ina ballada tragica. El vesa la bella giuvna e sa immediatamain che quai è l'elegida. Forsa ha el gia nauschas intenziuns. El fa plaschentinas, porta fluras e la maina in bel di giu tar il flum. Là creschan las rosas selvadias, bellas sco la giuvna. Lura la fin pauc romantica: El dat in ultim bitsch e di «tut la bellezza sto murir». E la giuvna Elisa Day sa uss pertge ch'ella vegniva numnada la rosa selvadia.
