Elecziuns-cussegl-federal-22-settember-2010

Simonetta Sommaruga (SP)e Johann Schneider Ammann (PLD) èn vegnì elegì ils 22 da settember 2010 sco novs cussegliers federals. Els daventan ils successurs dals cussegliers federals Moritz Leuenberger (SP) e Hans-Rudolf Merz (PLD) che han demissiunà. Cun l'elecziun da Sommaruga sco cussegliera federala è per l'emprima giada en l'istorgia da la Svizra quatter dunnas èn il Cussegl federal.

Novitads en connex cun las elecziuns dals 22 da settember

Il nov cussegl federal: quatter dunnas e trais umens

Per l'emprima giada en l'istorgia han a partir dad oz las dunnas ina maioritad en la regenza svizra. In fatg ed in di istoric. Cun l'elecziun da Johann Schneider-Ammann e Simonetta Sommaruga èn per la prima giada quatter dunnas en il cussegl federal. Ultra da quai èn omadus cussegliers federals oriunds da Berna. Era quai fatg è in novum. (cl)

Pressa cuntenta cun l'elecziun dals dus novs en il cussegl federal

Applaus da las gasettas svizras per l'elecziun dals dus novs en il cussegl federal, Simonetta Sommaruga e Johann Schneider-Amman. Per tscherts schurnalists è la maioritad feminina dal gremi in fatg istoric, ils commentaders dovran expressiuns sco surprendent u spectacular.

Festa per Sommaruga e Schneider-Ammann

In pèr tschient collavuraturs da la Ammann Group a Langenthal han festivà lur schef, il nov cusseglier federal Johann Schneider-Ammann. La nova cussegliera federala Simonetta Sommaruga è vegnida beneventada a Berna da numerus commembers da partida da la PS e da simpatisants.

Schneider-Ammann è il successur da Merz

Johann Schneider-Ammann è vegnì elegì cun 144 vuschs sco successur da Hans-Rudolf Merz.

Sommaruga è la successura da Leuenberger

Simonetta Sommaruga è vegnida elegida cun 159 vuschs sco successura da Moritz Leuenberger.

Leuenberger e Merz prendan cumià dal parlament

Las 8 ha la presidenta dal cussegl naziunal e da l'assamblea federala, Pascale Bruderer, avert la seduta cun onurar la lavur e numnar intginas staziuns da la carriera politica dals cussegliers federals partents, Moritz Leuenberger e Hans Rudolf Merz.

Las elecziuns restan avertas

Malgrà tuttas speculaziuns e suspecziuns restan las elecziuns avertas e plain tensiun. Candidatas e candidats uffizialas èn: per la Partida sozialdemocratica (PS) Simonetta Sommaruga e Jaqueline Fehr, per la Partida liberaldemocratica (PLD) Karin Keller-Sutter e Johann Schneider-Amman. La Partida populara (PPS) propona Jean Francois Rime per survegnir in segund sez en la regenza federala ed ils Verds emprovan da survegnir per l'emprima giada in mandat en il cussegl federal cun la candidata Brigit Wyss.(gc)

La PCD sustegna candidats uffizials da la PS e PLD

Cun gronda tensiun han ins spetgà oz suentermezdi ils hearings da la Partida cristiandemocrata cun ils candidats da la PS e da la PLD per il cussegl federal. Las vuschs da la PCD vegnan probabel ad esser decisivas damaun, damai ch'ils cristiandemocrats na sa preschentan betg cun in agen candidat. Las 52 vuschs da la fracziun da la PCD ensemen cun la EVP ed ils verds liberals pudessan pia procurar per las maioritads decisivas.

Il pievel avess gugent Sommaruga e Schneider-Ammann

Simonetta Sommaruga e Johann Schneider-Ammann daventan ils novs cussegliers federals, quai tenor la veglia dal pievel.

La PS tema per ses sez en il cussegl federal

La Partida socialdemocrata tema ch'ils Verds pudessan conquistar l'auter onn in sez en il cussegl federal e quai sin donn e cust da lur sez. Ils Verds sa preparian actualmain per il cumbat, scriva il secretari general da PS Thomas Christen sin la pagina d'internet da la partida. Christen sa referescha sin l'appel dals Verds vers la PS da sustegnair ina candidatura verda las proximas elecziuns dal cussegl federal. Quai saja ina smanatscha, manegia il secretari general. (bu)

Naginas reglas da quotas tar il cussegl federal

Il cussegl naziunal na vul betg reglas da quotas per l'elecziun dal cussegl federal. El ha refusà duas iniziativas da las partidas da sanestra. Ina pretendeva ch'i sto avair almain trais umens e trais dunnas en il cussegl federal, l'autra pretendeva ina quota linguistic-regiunala. (bu)

PLD nominescha Schneider-Ammann e Karin Keller-Suter

Tar ils liberaldemocratics vegnan nominats Johann Schneider-Ammann e Karin Keller-Sutter. La fracziun ha tscherni ils favurits, sin l'emprim plaz dal bigliet da dus è la cussegliera guvernativa, ministra da giustia da Son Gagl Keller Suter. Sco segund figurescha il cusseglier naziunal da Berna e represchentant da l'economia Schneider Amman. (fb)

Sommaruga e Fehr èn las candidatas da la PS

Somonetta Sommaruda e Jacqueline Fehr èn las candidatas uffizialas per il Cussegl federal da la Partida socialdemocratica. La fracziun da la PS dal parlament ha nominà Sommaruga, la cussegliera dals chantuns da Berna, e Fehr la cussegliera naziunala da Turitg, per l'elecziun dals 22 da settember. (fb)

PCD desista sin candidatura

La PCD desista d'in'atgna candidatura per il cussegl federal. Quai ha la fracziun decidì oz. La decisiun saja stada clera, ha il schef da la fracziun, Urs Schwaller ditg. Davart candidatas e candidats da las autras partidas na veglia la PCD betg s'exprimer per il mument. La PCD è anc adina da l'avis ch'i s'ardessi ad ella in segund sez en il cussegl federal. Ella vul dentant far valair quai pir suenter las elecziuns federalas da l'auter onn. (fb)

Brigit Wyss nominada per il Cussegl federal

La fracziun dals Verds ha nominà la cussegliera naziunala dal Soloturn, Brigit Wyss sco candidata per il cussegl federal, e quai cun ina clera maioritad. La fracziun saja dentant serradamain per Wyss, hai gì num da vart da la partida. La giurista per l'ambient, Brigit Wyss saja adattada il meglier per represchentar ils interess dals verds en il cussegl federal. (fb)

Rime è candidat per il cussegl federal da la PPS

Il cusseglier naziunal dal Friburg, Jean-François Rime è il candidat uffizial da la PPS per las elecziuns en il cussegl federal dals 22 da settember. La fracziun da la chasa federala ha nominà el oz unanimamain.

Ammann e Sommaruga èn vegnids nominads

La partida liberaldemocratica dal chantun Berna ha confirmà ier la candidatura dal cusseglier naziunal Johann Schneider Ammann per il sez en il cussegl federal. Ammann vala sco favurit per la successiun da Hans Rudolf Merz.

Era Jacqueline Fehr candidescha

Jacqueline Fehr vul daventar cussegliera federala. Quai ha la cussegliera naziunala da la partida socialdemocratica dal chantun Turitg communitgà oz a Turitg.

Peter Malama candidescha per successiun da Merz

Il cusseglier naziunal da Basilea Peter Malama candidescha per la successiun da cusseglier federal Hans-Rudolf Merz. Il directur da l'uniun da mastergn Basilea-Citad ha palesà il venderdi sia candidatura avant las medias.

PLD Son Gagl nominescha Keller-Sutter

Karin Keller-Sutter è candidata uffiziala per il cussegl federal. La radunanza da delegads da la PLD da Son Gagl ha nominà cun grond applaus la directura da giustia da Son Gagl.

Cussegl federal: Giezendanner ponderescha da candidar

Il cusseglier naziunal da l'Argovia Ulrich Giezendanner ponderescha da candidar per il cussegl federal. Il politicher da la PPS vul sa decider ils proxims dis. Il cussegl federal dovria urgentamain dapli cumpetenza economica, experientschas da manar ed in saun giudizi, communitgescha la PPS da l'Argovia, che ha dumandà Ulrich Giezendanner per ina candidatura. (pb)

Nagin candidat dal Glaruna per il Cussegl federal

La cussegliera guvernativa da Glaruna Marianne Dürst na candidescha betg per il cussegl federal. Ella era vegnida dumandada da las dunnas da la Partida liberaldemocratica. Marianne Dürst vul sa concentrar vinavant sin la politica chantunala, tranter auter sin la fusiun da las 25 vischnancas glarunaisas a sulettamain 3. Cunquai na datti nagins candidats da Glaruna per la successiun da Hans-Rudolf Merz. Il cusseglier dals chantuns Pankraz Freitag ha gia annunzià da desister sin ina candidatura. (gc)

Fässler vul vegnir successura da Leuenberger

La cussegliera naziunala da Son Gagl Hildegard Fässler candidescha sco successura da Moritz Leuenberger. Quai ha la socialdemocrata da 59 onns communitgà oz.

Schneider-Ammann vul daventar cusseglier federal

Il cusseglier naziunal bernais Johann Schneider-Ammann vul daventar cusseglier federal. Il liberaldemocrat candidescha sco successur da Hans-Rudolf Merz che sa retira. L'interprendider è uschia il terz candidat or da las retschas da la PLD che candidescha per il cussegl federal.

Hanselmann na vul betg candidar

La cussegliera guvernativa da Son Gagl Heidi Hanselmann na vul betg daventar cussegliera federala e successura da Moritz Leuenberger. Heidi Hanselmann veglia sa concentrar vinavant sin la lavur en la regenza, communitgescha la Partida socialdemocratica dal Son Gagl. Era ils socialdemocrats dal chantun Sviz na nomineschan nagin candidat per l'elecziun dals 22 da settember. Il cusseglier naziunal Andy Tschümperlin ed il cusseglier guvernativ Armin Hüppin desistan cunquai ch'ina dunna saja dumandada sco successura da Moritz Leuenberger. (gc)

Caspar Baader desista d'ina candidatura

Caspar Baader, il cusseglier naziunal e president da la fracziun da la PPS, desista d'ina candidatura sco cusseglier federal. Sin ses giavisch na nominescha la Partida populara da Basilea-Champagna betg el, hai num en ina communicaziun. Il president da la PPS svizra Toni Brunner aveva numnà Caspar Baader in candidat pussaivel. Cler è che la PPS va cun in agen candidat en l'elecziun dal cussegl federal per la successiun da Hans-Rudolf Merz e Moritz Leuenberger. Dal chantun Berna na datti nagins candidats, nagin n'haja demussà interess, communitgescha la PPS bernaisa. (fa)

Ils Verds vulan en il cussegl federal

Ils Verds candideschan cun in agen candidat per las elecziuns dal cussegl federal. Ier saira han ils verds numnà emprims nums.

Schwaller na vul betg candidar

Il cusseglier dals chantuns da la PCD, Urs Schwaller, na vul betg candidar per il cussegl federal. Quai ha el ditg a la "Tagesschau", l'emissiun d'informaziun da la televisiun svizra, SF. Schwaller aveva candidà tar l'elecziun cumplementara per l'anteriur cussegl federal Pascal Couchepin avant in onn per il segund sez da la PLD, dentant senza success. Suenter la nunreelecziun da Ruth Metzler il december da l'onn 2003 ha la PCD be anc in sez en la regenza svizra. La fracziun da la PCD vegn a decider sia strategia per las elecziuns en sia sesida dals 3 e dals 4 da settember. (gc)

PCD sposta decisiun pervia d'ina atgna candidatura

La Partida cristiandemocratica (PCD) da la Svizra lascha avert tut las opziuns. Ella ha spustà il termin da decider sur d'ina atgna candidatura per il cussegl federal. Quai ha communitgà oz la suprastanza da fracziun. Sche la partida vegn a candidar per in dals sezs, vegn l'entira fracziun a decider a la radunanza dals 3 u 4 da settember. Enfin alura vegnia quai discurrì cun las candidatas u ils candidats pussaivels. Suenter che Ruth Metzler n'era betg vegnida reelegida en il cussegl federal il december 2007, ha la PCD mo pli in sez en il cussegl federal. (gc)