Hockey: Cuira Capricorns gudognan ordaifer

En l'emprima liga dal hockey regiunal han ils Cuira Capricorns gudagnà ordaifer cunter l'EHC Wetzikon - quai cun 3:1. A l'EHC Arosa n'èsi dentant betg ì uschè bain. Arosa ha pers a chasa cunter l'EHC Bülach cun 1:2.

L'EHC Cuira sa legra da la victoria cunter l'EHC Wetzikon. Bild in Lightbox öffnen.

Legenda da maletgs: L'EHC Cuira sa legra da la victoria cunter l'EHC Wetzikon. ehcfans.ch

Suenter las emprimas 3 rundas da campiunadi è Cuira sin il quart plaz da la tabella cun 6 puncts, 3 pli pauc che Bülach. Arosa ha 3 puncts sin il conto e sa chatta l'8avel plaz. San Murezzan perda derby Ier saira hai dà l'emprim derby grischun en la segunda liga. Il club da hockey Lai/Valbella ha gudagnà quest derby cun 6:4 encunter San Murezzan. Quai suenter che San Murezzan avevan anc gudagnà l'emprim gieu da la stagiun encunter Kreuzlingen cleramain cun 10:0. "Perder in derby fa adina mal", ha ditg Andri Casty, il schef da sport dal club da hockey San Murezzan. "Cunzunt cura ch'in gieu è uschè equilibrà, sco quel dad ier." La finala haja dentant Lai/Valbella gudagnà meritadamain il gieu. San Murezzan haja simplamain fatg memia blers sbagls individuals, explitgescha Andri Casty la sperdita. (gc/rtr) Ils resultads da la segunda liga: HC Partenz-Signuradi - l'EV Dielsdorf-Niederhasli (3:4) Club da hockey Engiadina - SC Herisau (4:0)