Tgi che sa rumantsch sa dapli
RTR
En la part veglia da Tusaun è ars giu oz en damaun ina chasa veglia da trais auzadas. Sco la polizia chantunala communitgescha èn 4 persunas, tranter quellas in uffant vegnidas manadas a l'ospital pervia da suspect d'intoxicaziun da fim. 60 persunas en vegnidas evacuadas. Sco il cumandant dals pumpiers Reihold Ziegler ha confermà al RR è il fieu ussa sut controlla.
xong.net
Il festival da musica e cultura XONG stat curt avant la fin. L'occurrenza da musica e cultura en las regiuns da cunfin da l'Austria e Svizra che ha fascinà enfin ussa vegn manà atras la fin fanadur per la davosa giada. Il motiv per la fin è la gronda sfida d'organisar in tal festival mo en il temp liber e sin basa voluntaria. Quai pensum da lavur surpassia las capacitads da la societad purtadra Arcus Reatiae.
RTR
Ils 7 da mars decida il suveran grischun davart la nova gulivaziun da finanzas NFA. Or da vista dals adherents porta quella gulivaziun blers avantatgs a las vischnancas, per ils adversaris munta la NFA in privel. Il mument cumbattan tant ils adversaris, sco er ils adherents per mintga vusch. Uschia er ier saira ad ina discussiun da podi en la scol'auta professiunala a Cuira.
RTR
Il Grischun talian vegnia tralaschà en ils programs da radio e televisiun da la Svizra taliana. Quella rinfatscha han il chantun Grischun e quatter persunas privatas fatg l'atun passà e reclamà tar l'uffizi federal da communicaziun Bakom. Uss ha la Corsi, l'uniun purtadra da la RSI, prendì posiziun. Ella na lascha betg valair las rinfatschas.
RTR
Il traffic turistic tras l`Engiadina en direcziun Livigno chaschuna dapi plirs onns problems e discussiuns en l'Engiadina. In traffic che chaschuna era colonnas e disturbis en las vischnancas tras in pitschen tunnel privat da las ovras electricas per cuntanscher Livigno. Dapi in mais han ins ina cunvegna per tegnair avert quai tunnel er la notg. Quella schliaziun para dentant betg dad avair success.
Keystone
Ils schabetgs enturn la mort da Markus Reinhardt ed il rosoli che commembers da la polizia chantunala hajan bavì dus dis avant la mort da Reinhardt a Tavau vegnan ad avair pauc influenza sin la successiun dal cumandant da la polizia chantunala. Quai tenor il secretari dal departament da sanadad, giustia e segirezza dal Grischun, Matthias Fässler. La scheffa dal departament, Barbara Janom-Steiner, n'haja anc betg decidì co e cura ch'il successur vegnia tschernì. Tgunsch vegni la plazza scritta ora cunter la fin da quest u il proxim mais.
RTR
La purschida da divertiment a Plaun Petschen sut Cumpadials duai vegnir schlargiada. Sper il lajet e la plazza da giugar existenta duessi dar plazzas per sports sin sablun. Ils iniziants planiseschan da far ina plazza da sablun da 24 sin 26 meters u d'ina surfatscha da 620 m2. Sin quella plazza datti indrizs per duas plazzas da ballarait sin sablun. Duvrar la plazza pon ins dentant era per auters sports sco per exempel beach-soccer. Ils custs èn calculads cun 100'000 francs. Sche tut va tenor plan, duess ins pudair duvrar la plazza vers stad.
colourbox.com
Las ovras electricas Valragn a Tusaun han producì l'onn da gestiun 2008/09 pli pauca electricitad che l'onn da gestiun avant. Er il gudogn è stà pli pitschen. El munta a bun 4 milliuns francs. L'onn avant era el anc bun in mez milliun pli aut. Quai è vegnì publitgà en il rapport annual, ch'è vegnì publitgà oz.
TvR
La nova chasa da tgira da l'Engiadin'Ota duess vegnir realisada en il quartier Promulins a Samedan. E quai en il medem lieu nua che la chasa existenta sa chatta. Quai pretenda la societad glista libra, che ha preschentà oz in studi tge ch'è realisabel. Per ils emploiads da la chasa da tgira, na fa quai dentant betg senn. Els avessan pli gugent ina chasa nova per l'ospital.
Keystone
En il chantun Grischun ed en sis ulteriurs chantuns èn vegnids sclerids daplirs cas da fraud d'ustaria. In serb da 30 onns vegn suspectà, da na betg avair paja ils quints en hotels. L'um è vegnì arrestà mardi passà en il chantun Zug. La summa betg pajada munta a bun 30'000 francs. L'um è vegnì surdà da Zug al chantun Grischun. Qua èn vegnids registrads sis cas, ha la polizia communitgà. L'um aveva pernottà en hotels ed era svanì, senza pajar ils quints.
RTR
En il chantun Grischun datti adina pli paucs purs che tiran puschina sin la naiv. Quai e stà d'udir da l'uffizi per ambient dal Grischun. Ils manaschis da purs moderns sajan s'adattads bain als basegns e las capacitads da las puschineras tanschian. Anc avant paucs onns devi 20 fin 25 cas che purs bittavan la puschina sin il prà d'enviern, uss anc 2 fin 3 ad onn.
RTR
In Grischun na mancan betg mo ils magisters secundars, era la scola primara ha massa pacs magisters rumantschs. Quai ha ditg Johannes Flury, il rectur da la Scola auta pedagogica dal Grischun a Cuira in occasiun da la radunanza dals commembers dals cussegls da scola.
TvR
La societad sa mida e las baselgias vesan ch'ellas ston s'adattar a situaziuns novas. Dentant co far quai? Ina mira duess esser quel da mantegnair las forzas, valurs ed il cuntegn che ha adina fatg ora la baselgia cristiana e dad adattar mo las structuras. En quella direcziun è ida ier ina dieta che il Colloqui da la baselgia evangelica d'Engiadina Bassa e la Val Müstair ha organisà a Lavin.
regiun-surselva.ch
Ils organisaturs èn cuntents, las preschentaziuns a Mustér èn stadas vendidas ora. Ils custs dal muscial fissan uschia da principi stads cuverts. Pervia da problems cun la tecnica per las preschentaziuns dad oz en la Fermata a Falera ha il musical dentant custà dapli ch'ils 100'000 francs calculads. Grazia a garanzias da deficit han ins dentant savì schliar quest problem, di il manader da la scola da musica Surselva Claudio Simonet.
RTR, L. Livers
La PLD dal cirquit da Trin vul in sez dapli en il Cussegl grond. I sa tracta da quai sez supplementar ch' il cirquit ha da bun tenor la nova repartiziun dal chantun. La PLD ha uss nominà il deputà actual Thomas Raghettli da Flem ed ils novs Lucrezia Furrer da Favugn, Martin Wieland da Tumein e Peter Giacomelli da Trin sco candidats per las elecziuns. Sco president cirquital ha la PLD nominà Hans Telli, il president communal da Trin.
RTR
La Scol'aulta da pedagogia dal Grischun porscha naven da quest atun in "coach" en plazza parziala che accumpogna e tgira scolasts primars che instrueschan sin scalem superiur. Cun quella nova purschida reagischa la Scol'aulta da pedagogia sin il grond manco da scolasts secundars, che sforza adina dapli vischnancas dad engaschar scolasts primars per il scalem superiur.
RTR, L.Livers
Il til da tschaiver da Trun ha giu lieu quest onn senza participaziun da las scolas. Gest quella mancanza e alura era stada il tema grond da quai til. 24 furmaziuns en marschadas oz suentermezdi atras il vitg da Trun. Agl ur da la via pasavan ils aspectaturs in a l'auter giu per ils pes.
engadin-strom.ch
Ils consuments da las vischnancas concessiunarias da las Ovras Electricas d'Engiadina ston forsa pajar pli pauc per lur current en ils proxims 40 onns. Quai grazia ad in artitgel en il contract da concessiun e grazia a documents vegls ch'ins ha chattà e che pudessan dar ina nova interpretaziun da quai artitgel. Ils delegads da las vischnancas tranter S-chanf e Tschlin èn actualmain en tractativas cun las ovras electricas.
Colourbox
Cun ina concurrenza vul la pro Senectute Surselva animar uniuns e scolas dad organisar projects ni occurrenzas per attempads. Ils daners per quella concurrenza metta la Raiffeisen Cadi a disposiziun, numnadamain rodund 8'000 francs. Quai tenor Alfons Quinter, il directur da la banca Raiffeisen Cadi. Sustegni vegnian projects, occurrenzas e purschidas per attempads en la regiun da Trun fin a Tujetsch.
gemeindeflims.ch
A Flem vegn allontanada la collina da crappa cun il center d'infurmaziun davart il sviament. La suprastanza communala ha approvà in credit da 10milli francs per quest scopo. Avant 5 onns aveva ina cumissiun inizià quella collina per confruntar la populaziun cun il sviament ed il tunnel da Flem. En la collina cuvernada cun crappa dal tunnel sa chatta in localet d'infurmaziun. Ella aveva custà 50milli francs. Uss duai ella esser davent sin la fin d'atun.
ANR, M.Fontana
Dapli dus onns tschertga il medi Enrico Bisaz da Zernez in successur che vuless surpigliar sia pratica da medi a Zernez. El n'ha betg chattà in successur. Uss ha el serrà la pratica senza substituziun. Ils pazients ston guardar da midar tar in auter medi en la regiun.
RTR, H.Giger
Il gudogn brut dal 2009 è s'augmentà per 14 pertschient sin 224 milliuns francs, il gudogn da concern è creschì per 17 pertschient sin 144 milliuns francs. La quota da facultads da clients è per 6,4 pertschient pli auta ch'il 2008. Cun quai po consolidar vinavant l'institut grischun da banca sia posiziun sin la fiera. I profitan tant il chantun sco er ils investurs. La dividenda vegn augmentada per trais francs sin 35 francs.
RTR
Ina destinaziun turistica pitschna sco la Val Stussavgia stoppia sa colliar cun in'organisaziun pli gronda. Quai tenor la manadra da l'organisaziun Pro Val Stussavgia, Silvia Blattner. Ella haja gia contactà la Surselva Turissem SA e quinta da far quai pass enfin matg.
Samedan.ch
La vischnanca da Samedan è sin la tschertga d'in investider che vuless fabritgar in hotel sin l'areal Sper l'En. Actualmain sa chatta sin quai areal la plazza da glatsch. Emprims interessents han gia annunzià lur interess. Fin la fin da favrer pon els inoltrar lur offertas.
RTR
La realisaziun da la destinaziun Turistica "Engiadina-Scuol-Samignun-Parc Naziunal" è tant sco decisa. Il cussegl administrativ da l'Engiadina Scuol Turissem, la suprastanza da Samignun Turissem e la suprastanza da Turissem Val Müstair, han decidì unanimamain da vulair realisar la destinaziun communabla.
wikipedia.org
La glista da las demissiuns d'uffizials en la vischnanca da Sumvitg para lunga. Betg main che 10 demissiuns haja dà, tranter auter dus commembers da la suprastanza e quatter commembers dal cussegl da scola. Tenor Walter Deplazes, president da vischnanca, è remplazzar quatter da tschintg commembers dal cussegl da scola il pli grev. Plinavant han demissiunà trais commembers da la cumissiun da bajegiar ed in da la cumissiun da gestiun.
Ils verd liberals dal Grischun sustegna la nova gulivaziun da finanzas. La radunanza da partida han decidì la parola da gea per il project chantunal preschentà al pievel ils 7 da mars. Per il project federal d'adattar la tariffa minimala da conversiun tar las cassas da pensiun vegn dà liber la vusch. Ils dus ulteriurs projects vegnan sustegnids dals verd liberals grischuns, l'iniziativa per l'advocat dals animals ed il nov artichel constituziunal pervi da la perscrutaziun tar ils umans.
Ils dus grond-cussegliers burgais-democratics d'Engiadina Bassa, Jon Domenic Parolini da Scuol e Roland Conrad da Zernez sa mettan a disposiziun per in'ulteriura perioda d'uffizi. La radunanza da partida ha fatg las nominas per las elecziuns cirquitalas dals 13 da zercladur. Sco suppleants candideschan Emil Müller da Susch e Men Duri Ellemunter da Scuol. Il mastral dal circul da Suot Tasna Jörg Kindschi da Ftan candidesch per in'ulteriura perioda d'uffizi.
TvR
La plazza da golf Viamala stat avant novs craps da stgarpitsch. Ils purs pertutgads na vulan betg dar terren per la plazza da Golf. Els na sajan betg encunter il svilup en la Val Schons, la sperdita da terren d'agricultura da bajegiar ina plazza da Golf fissi dentant memia gronda. Ils promoturs da golf en Val Schons emprovan vinavant da realisar quella plazza da golf. Enfin ussa na saja era betg cler nua che la ruta da golf vegnia ed ins sappia guntgir il possess dal purs uschia fitg sco pussaivel.
RTR, S. Hug
Il transport da biestga duai vegnir coordinà ed optimà. Quai è la finamira dal project "logistica per il transport" da la graubündenVieh SA. La stad vargada ha lezza inizià quai project. Il manader dal project Gion Vincenz fa ina bilantscha positiva. 4'000 animals èn vegnids transportads da purs en il Grischun, quai saja dapli che spetgà. Il proxim temps vegnì Vincenz a metter paisa sin scolar ils purs da duvrar l'internet per che daplirs fetschian las annunzias per internet e na betg pli per telefon.
| Musica on air | Live |
|
11:52 Plüsch - Häbs Guet 11:56 Vonda Shepard - Read Your Mind
| |
Grazia che vus visitais nossa pagina!
Voss'opiniun interessescha nus. Prendai in zichel temp e respundai intginas dumondas davart nossa pagina.
Grazia fitg!
respunder a las dumondas
