Quai che Carlo Janka haja mussà en il super-G a Jeongseon, sin la pista olimpica dal 2018, saja stà gronda classa di Pius Berni da Sursaissa, trenader da cundiziun durant la stad da Janka. Il success saja dentant er remartgabels suenter tut ils problems da sanadad ils davos onns. Er la preparaziun sin questa stagiun n’è betg stada optimala pervia da mal il dies.
Tranter la crème de la crème
La victoria a Jeongseon è sa chapescha il pli grond success en questa stagiun per Carlo Janka. I n’è dentant betg il sulet bun resultat. Gia en la cursa rapida da Kitzbühel veva Janka mussà cun ses terz plaz ch’el auda anc adina tranter ils megliers dals megliers. Tut en tut è il skiunz da 29 onns gia stà 9 giadas en ils top 10 en questa stagiun. Sulet da si'anteriura disciplina da parada ha Janka stuì desister, il slalom gigant, la disciplina nua ch’el è gia stà campiun mundial ed olimpic.
Resta Carlo Janka saun e fit èsi bain pussibel, ch’el gudogna anc ulteriuras cursas da la cuppa mundiala. E suenter il success sin la pista olimpica dal 2018 astg’ins forsa schizunt siemiar d’in ulteriur success olimpic en bun dus onns.