Gieus olimpics: Paris 2024 e Los Angeles 2028

Sco spetgà ha la radunanza plenara da l'IOC surdà ils gieus olimpics als sulets dus candidats.

President da l'IOC. Bild in Lightbox öffnen.

Legenda da maletgs: Ha annunzià quai ch'era gia cler: Il president da l'IOC Thomas Bach. Keystone

Uss èsi uffizial: Ils gieus olimpics da stad il 2024 èn a Paris. Quels quatter onns pli tard a Los Angeles. Quai ha decis formalmain la radunanza plenara dals commembers dal Comité olimpic internaziunal (IOC) a Lima en il Peru.

Uschia organiseschan Paris e Los Angeles – sco emprimas citads insumma – mintgamai gia per la terza giada gieus olimpics. Paris aveva gia organisà ils gieus ils onns 1900 e 1924. Los Angeles ils onns 1932 e 1984.

Cumpareglià cun auters gieus olimpics èn lur budgets plitost moderads, cunquai che per gronda part l'infrastructura existenta duai vegnir utilisada. Paris ha budgetà ils custs cun 6,6 milliardas euros, Los Angeles cun 4,8 milliardas euros. En cumparegliaziun: Sotschi 2014 ha custà almain 33 milliardas euros.

RR novitads 20:00