Siglir tar il cuntegn

Header

cuntegn

Naziunal/Internaziunal Il GP Val stat puspè sin fermas chommas

Il Grond premi da Val Son Pieder è puspè in punct fix en il chalender da las cursas da velo en il Grischun. Suenter 30 ediziuns aveva quai dà ina pausa da set onns pervi da mancanza d'interess e da participants. Uss para il pazient GP Val puspè d'esser saun e frestg.

120 ciclistas e ciclists sajan s'annunziads gia ordavant. Mintg'onn intgins dapli di Marcus Derungs, in dals organisaturs. Ensemen cun Judith Huonder e Stefan Schwenke ha el inizià avant dus onns la renaschientscha dil GP Val. Uss organiseschan ils trais ciclists passiunai gia la terza giada en roda la cursa.

audio
Bunura: GP Val è puspè sin fermas chommas
ord Actualitad dals 30.04.2016.
laschar ir. Durada: 3 minutas 21 Secundas.

Encunter il trend

Il GP Val è en sasez ina cursa encunter il trend. Ozendi è la devisa savens «pli lung e pli stip». En il sport da currer èn quai ils ultra-maratons sco il Swissalpine a Tavau, en il sport da velo cursas sur plirs pass sco la Alpen Challenge a Lai ni il Maraton da velo da l'Engiadina a Zernez. Il GP Val perencunter è mo 21,2 kilometers lung cun ina differenza d'autezza da 550 meters. Mo perquai ch'el è a l'entschatta da la stagiun da velo è la cursa pli curta ina preparaziun perfetga per las cursas pli lungas che suondan pli tard.

Dus matadors locals èn ils favurits

Sco favurits valan quest onn dus matadors locals: Mathias Alig da Val Son Pieder e Vital Albin da Tersnaus ch'è actualmain il meglier giuven mountainbiker da la Svizra. Finamira dals megliers è dad esser pli spert che l'auto da posta. Quel dovra tenor urari exact 38 minutas da Glion a Val Son Pieder.

La 33avla ediziun dal GP Val è dumengia, l'emprim da matg 2016.

Artitgels legids il pli savens