Janka e Wengen - ina vair’amur

Duas giadas emprim (2009/2015), duas giadas segund (2010/2011) ed ina giada terz (2013). Carlo Janka e la cumbinaziun alpina da Wengen, quai constat. Cun sis plazs da podest en questa disciplina a Wengen è Carlo Janka onn per onn in dals gronds trumfs, er il 2017.

Bunura: Carlo Janka è pront

2:25 min, Actualitad dals 13.01.2017

Che Carlo Janka tutga er quest onn tar ils pli sperts sin la pista al pe dad Eiger, Mönch e Jungfrau. Quai ha il skiunz da Sursaissa mussà en ils trenaments cun ils plazs 4 e 2. Ed er la disciplina slalom ha Janka trenà ils davos dis, ed ad Adelboden è el schizunt stà a la partenza sco precursur. Sper il Franzos Alexis Pinturault, il victur dal 2013, ed il Norvegiais Kjetil Jansrud, il victur da l’onn passà, tutga Janka tar ils top-favurits per in plaz da podest.

In segund Grischun

Schanzas sin in plaz da podest ha er il Grischun Mauro Caviezel ch’è daventà la fin december 8avel en la cumbinaziun alpina da Santa Caterina. Caviezel sto dentant mussar in exploit en il slalom, ina disciplina ch’è vegnida a la curta il davos temp.

Novs temps da partenza

La cumbinaziun alpina da Wengen vegn lantschada quest onn a las 10:15 cun il percurs da slalom. La cursa rapida cumenza lura il suentermezdi a las 13:45.

RR actualitad 07:00