In ch'ha astgà festivar in grond success, il pli grond insumma da sia carriera, è il skiunz glarunais Patrick Küng ch’è daventà il favrer a Vail/Beaver Creek campiun mundial en la cursa rapida. Il titel da campiun mundial ha er Nino Schurter astgà festivar en la disciplina cross-country da mountainbike. Per Schurter èsi insumma stà in stagiun perfetga. Sper il titel da campiun mundial ha il mountainbiker er gudagnar la cuppa mundiala generala.
HCD per la 31avla giada
Il Club da hockey da Tavau ha procurà per ina da las grondas surpraisas en il campiunadi da hockey. L’equipa d’Arno del Curto è partida cun pauc credit en la stagiun, er pervi da grondas midadas en il cader. La finala ha il HCD tuttina gudagnà il titel, il 31avel en l’istorgia dal club.
E betg d’emblidar il success da la naziunala Svizra da ballape ch’ha pudì sa qualifitgar per il campiunadi d’Europa l’onn proxim en Frantscha, quai sut la batgetta dal trenader Vladimir Petkovic.
Il crimi da la FIFA
Durant il 2015 hai dentant er dà plirs scandals, tals ch’ha mussà l’autra vart da la medaglia. Per lingias grassas ha procurà oravant tut la FIFA. I vegn rinfatschà a la Federaziun mundiala da ballape cugliunaria, corrupziun, lavada da daners suspectus. Gronda critica e rinfatschas er envers il president Sepp Blatter. Curt avant Nadal èn Blatter sco er il president da l’UEFA, Michel Platini, vegnids suspendids per 8 onns, quai che munta pli probabel la fin da la carriera per ils dus funcziunaris.
Scandals da doping er il 2015
Er il scandal da doping tar la Federaziun d’atletica leva en Russia è stà in dals puncts negativs dals davos mais. I vegnia dopà sistematic, uschia las rinfatschas. Bler è vegnì a la glisch, sinaquai èn er blers sportists, trenaders e funcziunaris vegnids suspendids. La Wada, l’agentura mundiala d’anti-doping, ha reagì vehement sin quai scandal e recumandà d’ex clauder la Russia da la Federaziun mundiala d’atletica leva. Sch’ils Russ pon ussa ir a la partenza als gieus olimpics d’in auter onn a Rio de Janeiro, quai stat anc scrit en las stailas.