Suenter il skiatlon ha Marit Björgen er gudagnà als campiunadis mundials a Lahti aur en la cursa da 10 kilometers en il stil classic. La Norvegiaisa da 36 onns ha dominà la cursa da la partenza fin l’arrivada e triumfà cun in avantatg da passa 40 secundas sin la Svedaisa e defensura dal titel Charlotte Kalla. La medaglia da bronz ha gudagnà la Norvegiaisa Astrid Uhrenholdt Jacobsen. Per Marit Björgen èsi gia la 16avla medaglia dad aur a campiunadis mundials.
Trumpada per Von Siebenthal
Suenter il grondius quart plaz en il skiatlon ha la Svizra Nathalie von Siebenthal stuì magunar ina terrada en la cursa da 10 kilometers en il stil classic. La Bernaisa ha pers bunamein trais minutas sin la victura Marit Björgen ed è vegnida be 30avla. Meglier èsi i a sia collega Nadine Fähndrich ch’ha terminà la cursa sco 25avla. Omaduas partan gievgia en la cursa da staffetta ensemen cun las Grischunas Laurien van der Graaff e Seraina Boner.
RR novitads 14:00