Cun in viadi en il tren spezial ed ina ceremonia a Tavau en preschientscha dal president da la regenza grischuna, Christian Rathgeb, è vegní celebrà oz il titel da campiunessas da curling da la squadra da Flem.
Che las sportistas ch'han gudagnà quest onn gia per la segunda giada suenter il 2014 aur als champiunadis mundials da curling, sajan idols per la giuventegna, ha ditg Rathgeb en ses pled. Talas prestaziuns valan tenor il president da la regenza dapli che mintga program da promoziun per il sport tras il chantun.
Sper la fermada lunga a Tavau ha il tren fatg stops d'autogram a Filisur e Landquart. la fin dal viadi è lura stà en la patria dal club da la squadra. Flem ha festegià sias campiunessas, la squadra cun skip Binia Feltscher-Beeli e las atletas Irene Schori, Franziska Kaufmann e Christine Urech, cun undraziun uffiziala ed aperitif da cuminanza.
La fin da mars da quest onn aveva la squadra da Binia Feltscher-Beeli gudagnà il campiunadi mundial. En in final plain tensiun han las Svizras battì il Giapun cun 9:6. La decisiun è crudada en il 10avel end.
Per la squadra dal Club da curling Flem è quai però gia il segund titel da campiun mundial suenter il 2014.
Tut en tut ha la Svizra triumfà 4 giadas ils ultims 5 onns.
RR Sportissimo