Niels Hintermann va, profitescha e gudogna a Wengen

Il skiunz svizzer è parti sco 8avel tar la cursa rapida da la cumbinaziun alpina dal Lauberhorn. E cun ina buna cursa e cletg cun il stan da la pista gudogna Niels Hintermann per surpraisa da tuts, ed era d’el sez. Justin Murisier che manava suenter il slalom daventa 7avel.

Il skiunz Niels Hintermann Bild in Lightbox öffnen.

Legenda da maletgs: Niels Hintermann durant sia cursa da slalom a Wengen. Keystone

Il Svizzer Murisier manava suenter il slalom da la cumbinaziun Murisier cun in avantatg da passa 3 secundas sin Hintermann, quest avantatg è sa mida en la cursa rapida en in retard da passa 1 secunda. Avant Murisier ch'è la finala vegnì 7avel sa ranghescha Nils Mani sco segund meglier Svizzer sin plazza 5.

Grischuns manchentan ils top 10

Ils Grischuns Mauro Caviezel e Carlo Janka daventan 12avel e 19avel da la cumbinaziun alpina da Wengen. E Gian Luca Barandun, il noviz grischun en la cuppa mundiala, cuntanscha la plazza 28.

Nums novs enstagl da favurits

Era profità da l'aura ch'era anc in zic meglra a l'entschatta da la cursa, han il Franzos Maxence Muzaton che daventa segund e l'Austriac Frederic Berthold che vegn terz. Dus dals top-favurits da la cumbinaziun, ils Franzos Victor Muffat-Jeandet e Alexis Pinturault, daventan 18avel e 20avel.

Pervi da l'aura avevan ils organisaturs da Wengen spustà il lieu da partenza da la cursa rapida, sut il Hundschopf tar la Minschkante.

Dunnas senza trenament

Era il segund trenament per la cursa rapida da las dunnas a Zauchensee è crudà pervi da la bischa e la nebla. La cursa da trenament ch'è necessaria duain las dunnas absolver uss la sonda avantmezdi.

A Zauchensee datti dentant probablamain era la sonda naiv nova. Impedescha quella puspè la cursa rapida, è l'idea da spustar la cursa rapida sin la dumengia e da laschar crudar la cumbinaziun planisada.

RR novitads 12:00++