San Murezzan 2017 Gino Caviezel vul suandar ses frar Mauro

Schebain ch’ils quatter Svizzers na tutgan betg tar ils favurits per ils plazs da podest en il slalom gigant, spera il Grischun Gino Caviezel sin ina surpraisa. Ch’in effort è pussaivel, ha ses frar grond Mauro Caviezel mussà en la cursa da cumbinaziun. Gino Caviezel vul suandar ses frar.

Gino Caviezel durant la cursa a Garmisch Bild in Lightbox öffnen.

Legenda da maletgs: Gino Caviezel vul far sco ses frar Mauro e procurar per ina surpraisa a San Murezzan. Keystone

Gino Caviezel era mez viaden en las preparativas per sia cursa al champiunadi mundial, cura che ses frar Mauro ha gudagnà surprendentamain la medaglia da bronz en la cumbinaziun.

Gino n’ha betg targlinà ed è immediat sa mess en viadi vers San Murezzan per festivar cun el. Mauro ha mussà che surpraisas èn pussaivlas. Il frar giuven Gino vul uss era dumagnar ina.

«  Jau stoss ir spert, uschiglio è Mauro il schef a chasa. »

Gino Caviezel
skiunz

Betg mo ina medaglia da Gino Caviezel fiss ina surpraisa, quai vala era per tschels trais Svizzers a la partenza, Carlo Janka, Justin Murisier e Loïc Meillard. Las meglras schanzas ha tgunsch Justin Murisier, ch’è vegnì trais giadas tranter ils pli sperts 10 en questa stagiun en il slalom gigant.