Siglir tar il cuntegn

Header

cuntegn

San Murezzan 2017 Taglià la corda: Aviun strivla camera pendenta a San Murezzan

In aviun acrobatic da la squadra PC-7 da l'Armada svizra ha taglià durant in trenament per ina show il cabel che purtava ina «camera pendenta». Per fortuna èsi stà be ina quasi-catastrofa: nagin è vegnì blessà.

audio
Incap tar trenament da squadriglia PC-7 a San Murezzan
ord Actualitad dals 17.02.2017.
laschar ir. Durada: 1 minuta 18 Secundas.

En ina manevra da trenament per las shows aviaticas da la fin d'emna aveva in dals set aviuns dal tip PC-7 da la squadra da l'Armada svizra strivlà il cabel da la camera pendenta. Quai tenor la Polizia chantunala. Il cabel è montà lung il traject da cursa e pussibilitescha da laschar currer ina camera pendenta telecumandada lung ils curridurs sin il traject da cursa.

La camera è crudada amez l'arrivada a Salastrains. Ni pilot ni aspectaturs èn vegnids blessads. L'aviun PC-7 ha pudì atterrar a Samedan. Suenter che il cabel è da giu aveva il cabel er mess ord funcziun per in mument la sutgera, che avess stuì transportar ils curridurs si tar la partenza las 13:00. Il segund percurs dal slalom gigant dals umens ha perquai gi lieu ina mes’ura pli tard.

audio
San Murezzan : Ils organisaturs discurran da fortuna
ord Actualitad dals 13.02.2017.
laschar ir. Durada: 1 minuta 17 Secundas.

Donn da 280'000 francs, motivs anc betg clers

Tenor la polizia chantunala hai dà per la Societad Svizra da Radio e Televisiun SSR SRG in donn da radund 280'000 francs quai che reguarda la camera che è crudada giu. Sche i ha era dà in donn vid l'aviun militar n'è betg enconuschent. La polizia chantunala n'ha betg pudì dar infurmaziuns en quel connex. Era dumondas davart motivs per l'incap n'ha la polizia chantunala betg respundì, quai pervia che las inquisiziuns n'èn anc betg fatgas. Uschia na san ins betg sche il cabel era montà sin la autezza gista u sche l'aviun fiss sgulà memia bas.

audio
Il militar ha annulà las shows da PC-7 a San Murezzan
ord Actualitad dals 17.02.2017.
laschar ir. Durada: 19 Secundas.

Naginas shows pli

Il Departament federal da defensiun, protecziun da la populaziun e sport ha confermà envers RTR che las shows da la squadriglia PC-7 da l'armada svizra da questa fin d'emna a San Murezzan èn annuladas suenter quest incap. Tant la polizia chantunala sco er la procura publica grischuna investigheschan il cas.

Betg ina surpraisa per Parmelin

Il minister da defensiun Guy Parmelin ha duvrà pleds directs per l’incap cun la camera a San Murezzan. El saja da l’avis ch’els hajan detg savens tals accidents, quai ha il cusseglier federal ditg a la ‘Tagesschau’ da la televisiun SRF.

En si’emprima reacziun a l’ur da la Conferenza da segirezza a Minca ha el empermess in’analisa exacta da la situaziun. Era sch’els hajan gì grond cletg e nagin saja vegnì blessà, sa tractia d’in incap gravant.

RR novitads 14:00

Artitgels legids il pli savens