Siglir tar il cuntegn

Header

cuntegn

San Murezzan 2017 Voluntari durant trais Campiunadis mundials da skis en Engiadina

Ruedi Bühler da Zernez lavura durant questa ediziun gia per la terza giada en fila a San Murezzan sco gidanter sin pista. L’um sportiv da 71 onns giauda surtut la cuminanza che la famiglia dals voluntaris porscha.

Da la partida è Ruedi Bühler gia stà sco voluntari tar ils Campiunadis mundials il 1974 ed er tar l'ultim grond eveniment en Engiadina il 2003, ha el lavurà sco voluntari sin pista.

audio
Voluntari da passiun
ord Novitads dals 15.02.2017.
laschar ir. Durada: 3 minutas.

Pli svelt, pli modern

Sch’el cumpareglias las trais ediziuns ina cun l’autra, dettia surtut la tecnica en egl ed il grond svilup ch’ins ha fatg tranter il 1974 ed il 2003.

Bler dapli pais vegnia mess tar ils Campiunadis mundials da ski 2017 a San Murezzan er sin la reclama. Tut saja reglà, raquinta il voluntari passiunà.

Commember dal «Golden Club»

Ruedi Bühler è in da bun 25 persunas ch'han lavurà e gidà durant ils ultims trais Campiunadis mundials da skis en l'Engiadina. Sco grazia fitg èn ils voluntaris vegnids envidads ad in aperitiv en cumpagnia dals organisaturs actuals.

Per l’um da Zernez èsi clar che quest eveniment vegn ad esser l’ultim campiunadi mundial activ. Dentant saja el segir pront da gidar sco voluntari er anc suenter il grond eveniment a San Murezzan. Quest december han numnadamain già lieu a San Murezzan las proximas cursas da la Cuppa mundiala.

RR actualitad 11:00

Artitgels legids il pli savens