Malgrà che la naiv natirala manca dal tuttafatg è la seria internaziunala da passlung Ski Classics vegnida lantschada oz a Puntraschigna, quai cun in prolog da 10 kilometers sin naiv artifiziala. Tar las dunnas ha l’austriaca Katerina Smutna gudagnà, la grischuna Seraina Boner è vegnida tschintgavla. Victur tar ils umens è il norvegiais Petter Eliassen. Meglier svizzer è Candide Pralong sco tschintgavel. Meglier grischun è Toni Livers sco setavel. Il russ Ilya Chernousov, igl um da la biatleta Selina Gasparin, è novavel.
Ski Classics cumpiglia cursas famusas
La seria Ski Classics cumpiglia las pli famusas cursas popularas dal mund sco il Vasaloppet en Svezia, il Birkebeinerrennet en Norvegia ni la Marcialona en l’Italia. Bainprest turna la seria en l’Engiadina. Sonda, ils 21 da schaner è a Zuoz la Diagonela. Cuntrari al prolog a Puntraschigna è la Diagonela ina vaira cursa populara averta per tut quels ch’han gust da sa participar.
Ils svizzers han manchentà il podest
Tar las dunnas ha l’austriaca Katerina Smutna gudagnà, la grischuna Seraina Boner è vegnida tschintgavla. Victur tar ils umens è il norvegiais Petter Eliassen. Meglier svizzer è Candide Pralong sco tschintgavel. Meglier grischun è Toni Livers sco setavel. Il russ Ilya Chernousov, igl um da la biatleta Selina Gasparin, è novavel. La seria Ski Classics cumpiglia las pli famusas cursas popularas dal mund sco il Vasaloppet en Svezia. Bainprest turna la seria en l’Engiadina. Sonda, ils 21 da schaner è a Zuoz la Diagonela.
Gronds sforzs per garantir ina loipa a Puntraschigna
Malgrà las temperaturas bler memia chaudas èsi grategià als organisaturs a Puntraschigna da preparar ina buna loipa cun naiv artifiziala. Bain era la loipa in pau loma, han Toni Livers e Seraina Boner ditg a Radiotelevisiun Svizra Rumantscha. Mo las cundiziuns sajan stadas per tuts pli u main tuttina. Il tschancun saja stà pretensiuns sco i saja necessari per ina cursa da livel internaziunal.
RR novitads 14:00