Il Club da ballape Cuira 97 ha mussà duas fatschas diversas en questa stagiun: La runda d’atun ha Cuira terminà sin il tschintgavel plaz da la tabella. La primavaira ha l’equipa da la chapitala stuì magunar bleras terradas ed è crudada pli e pli fitg da la tabella giuadora. L’aspect positiv è, che Cuira ha mai gì d’avair tema da la relegaziun.
Midada da trenader ed exodus da giugaders
In dils motivs pudess esser la midada da trenader da quest enviern. Suenter ch’il trenader da success Thomas Waser è sa retratg è l’ollandais Jouke Faber vegnì al timun.
Quai na saja dentant stà il motiv, che l’equipa ha gì damain success la primavaira di il giugader sursilvan da Cuira Carlo Andrea Bearth. Plirs giugaders da tschep, oravant tut buns sajettagols, hajan bandunà il club durant la pausa d’enviern. Quels giugaders e lur gols hajan mancà la primavaira.
Bel ballape, ma nauschs resultats
Ils resultats da la primavaira na sajan propi betg stà buns admetta Carlo Bearth. Persuenter hajan blers giugaders fatg progress individuals. Il nov trenader promovi in ballape pli attractiv e varià. Bearth spera, che quels progress sa mussian lura en ils resultats da la proxima stagiun.
RR Sportissimo 17:40