Emanuel Müller da Basilea e Nina Zoller da Cuira han gudagnà il GP Val, il 34avel classicher da velo da Glion a Val sur 21,5 kilometers. Müller ha attatgà gia baud ed ha la finala triumfà solo en in temp da 38 minutas e 20 secundas.
Emanuel Müller – quart avant trais onns – è stà quest onn bun ina minuta pli sperts ch’il victur da l’onn passà, il mattadur local Vital Albin da Tersnaus. Terz è vegnì l’Austriac Christian Schmitt.
Nina Zoller emprima da las dunnas
Tar las dunnas ha la gronda favurita Nina Zoller triumfà en in temp da strusch 47 minutas. La ciclista da Cuira ha gudagnà il sprint final avant Laila Orenos che veva gudagnà l’onn passà l’Alpen Challenge a Lai. Terza cun in retard da passa duas minutas e mesa è vegnida Allesia Nay.
Tut en tut han 87 ciclistas e ciclists cuntanschì l’arrivada a Val. Il GP Val è la pli veglia cursa da velo en il Grischun.
RR novitads 15:00