Marcel Hirscher vul dar ses comeback – dentant betg per l'Austria, mabain per ils Pajais Bass, la patria da sia mamma. Quai scrivan las medias austriacas.
La federaziun da skis austriaca ha – tenor atgnas indicaziuns – gia lubì al skiunz da 35 onns da midar la naziun.
Lucas Braathen – ch'ha gia gudagnà tschintg cursas da la cuppa mundiala cun ses 23 onns – ha annunzià da puspè turnar il 2025 en la cuppa mundiala.
El na turna dentant betg per la Norvegia, mabain per la Brasilia – er la patria da sia mamma.
La davosa cursa è stada il 2019
Diesch onns ha Marcel Hirscher dominà il circus da skis – el vala sco in dals fitg gronds. Otg giadas en seria ha Hirscher gudagnà la gronda culla da cristal e gudagnà 67 cursas da la cuppa mundiala.
A partir da la stagiun 2016/2017 ha il skiunz austriac adina puspè annunzià ch'el ponderescha da sa retrair. L'onn 2019 ha el la finala confirmà sia decisiun ed terminà sia carriera da profi.
Il mund da skis spetga pia fitg spanegià sin il comeback da Marcel Hirscher, ch'ha 35 onns, e co quest comeback vegn a sa sviluppar cumpareglià cun ses success dal passà.
Or da l'achiv:
L'onn 2022 ha Marcel Hirscher anc dementì envers SRF las tschantschas da medias ch'el dettia forsa in comeback. El haja gì ses motivs per chalar. Schegea ch'el charezza anc adina l'ir cun skis n'haja el nagin gust pli sin il squitsch da prestaziun.
