Cura ch’il Gieri Decurtins ch’è gia dapi passa 10 onns pensiunà ha cumenzà a dar ballape na devi anc nagin moviment da juniors. Ils buobs en ils singuls quartiers ni en las singulas fracziuns da Trun furmavan perquai sezs equipas. Ils da Darvella danunder ch’il Gieri vegn deva per exempel encunter quels da Campliun – sin pastgira bain chapi. Propi cumenzà a dar ballape organisà ha el perquai pir sco creschi. Lura è il Gieri dentant stà fidaivel durant decennis al CB Trun e pli tard al CB Trun/Rabius e quai sco giugader, giugader-trenader, trenader e schizunt president.
L’astella vegn dal lain
Da pign ensi ha Roland Decurtins pudì accumpagnar ses bab Gieri sin las plazzas da ballape. Uschia è Roland passà en ils fastizs da ses bab. Entant che Gieri Decurtins è stà defensur è ses fegl Roland stà attatgader. Era Roland è stà blers onns giugader e pli tard giugader-trenader u trenader. Uss èn tant Gieri sco Roland savens sco aspectaturs a la plazza da ballape e miran co la terza generaziun dat. Patrizio, il fegl da Roland e biadi da Gieri è sco ses bab attatgader e cun corp ed olma commember dal Club da ballape Trun/Rabius.
Istorgias tut a dubel dals derbys encunter Tavanasa
Gieri, Roland e Patrizio èn tuts trais era chatschadurs passiunads. La saira en la tegia da chatscha discurran els era savens da ballape. E lura sa chapescha era dals derbys encunter ils rivals eterns da Danis-Tavanasa. Da quels datti adina da raquintar da bler.