Dals 75 onns che l’Uniun sportiva Danis-Tavanasa exista è Gabriel Derungs stà bun 50 onns activs en il club da ballape dals dus vitgets ch’appartegnan a la vischnanca da Breil. Actualmain è il scolast primar ch’è vegn pensiunà dacurt trenader da l’emprima equipa che dat en quarta liga. Gugent raquinta Gabriel Derungs da ses bab ch’è stà l’onn 1942 in dals fundaturs e l’emprim president. Ses bab Balzer saja stà quel che haja infectà el cun il virus da ballape.
La terza generaziun
Dentant è gia la terza generaziun dals Derungs activa u stada activa en l’US Danis-Tavanasa, ils biadis da Balzer e fegls da Gabriel. Il fegl vegl Curdin ha terminà l’onn passà sia carriera perquai ch’el viva uss en la Bassa. Gianin, il fegl giuven da Gabriel è anc adina en l’emprima equipa, è dentant il mument blessà. Curdin valeva ina giada sco talent. El ha giugà en la selecziun da la Svizra orientala ensemen cun Tranquillo Barnetta. Durant che Barnetta ha fatg ina gronda carriera internaziunala è Curdin Derungs dentant turnà tar sias ragischs e ses collegas en Surselva. Carriera avess era ses bab Gabriel pudì far. El ha giugà en l’emprima liga a Cuira sut il trenader Otto Pfister ch’è pli tard stà trenader naziunal da diversas naziuns en l’Africa. Mo era Gabriel è turnà en sia patria enstagl d’empruvar da far carriera en la Bassa.
Ils Derungs e lur derbys encunter ils da Trun
Ils da Trun, ni uss quels da Trun/Rabius, èn dapi decennis ils gronds rivals dals da Danis-Tavanasa. Pli baud eri quella rivalitad datiers d’in tschert fanatissem, oz saja quai ina rivalitad amiaivla. En mintga cas san ils Derungs raquintar bleras anecdotas dal derby da la Cadi.