Tusaun-Cazas ha dominà l'emprima mesadad dal gieu. Uschia ha Domat gì in pau dapli da far per proteger lur gol. Insumma èn omadus golis stads decisivs. Ellas han tegnì bain e pudì spendrar uschia intginas gadas il gieu. Tusaun ha adina puspè bajegià si il gieu ed attatgà. Domat percunter ha plitost giugà sin cunter-attatgas.
Gols mo en la segunda mesadad
La segunda mesadad ha Tusaun però dà gas e fatg dapli squitsch. Quai cun success. En la 51avla e 57avla minuta han Raduni e Baumberger sajettà ils emprims dus gols, e Menn ha decidì il gieu en la 73avla minuta al resultat final da 3:0 per il FC Tusaun.
Ils adversaris eterns
Gia dapi intgins onns giogan mintgamain Domat cunter Tusaun-Cazas il final da la Cuppa Grischuna. Ma adina han las dunnas da Tusaun-Cazas gudagnà quel. L'onn passà dentant è il resultat stà fitg cnap. Pir en ils penaltis aveva Tusaun-Cazas battì Domat.
livestream 13:20