Siglir tar il cuntegn
cuntegn

Archivar recumonda Bov ed asen – betg mo da Nadal

Bov ed asen han tar nus daditg pers lur funcziun essenziala e tradiziunala da trair stgerpa (guaffens da funs) e purtar rauba u carstgauns. Fertant ch’il destin dals arments mastgels è per il solit da daventar charn bov giauda l’asen puspè in return sco animal social e nizzaivel en plirs reguards.

Tar blers da nus sveglia il pèr da bov ed asen regurdientschas d’istorgias da Nadal. Els eran là en la stalla da Betlehem e stgaudavan cun lur flad il bambin en il parsepen.

Bov ed asen en la stalla da Nadal (Baselgia claustrala Mustér)
Legenda: Bov ed asen en la stalla da Nadal (Baselgia claustrala Mustér) RTR

In curt omagi a bov ed asen da Leo Tuor

Bov ed asen han en cuminaivel d'avair servì per millis onns la carstgaunadad sco manadira ed animal da sauma. En nossas cuntradas vegnivan els dentant era remplazzads dal chaval, quai tenor la facultad dal possessur, e per finir da maschinas, tractors e camiunettas.

Tge signifitga il bov per purs d'ozendi?

Las qualitads dal bov, sia forza cun trair criec e char, èn appreziadas anc en pajais asiatics. Tar nus ha el per il solit vita curta ed in destin gastronomic. Giatgen Arpagaus da Savognin tegna e dovra ses renumà bov Elvis en emprima lingia ord fascinaziun per la vita e la lavur da noss antenats.

Legenda: Guardar il video Il bov manadira Elvis da Giatgen Arpagaus – Telesguard 10.05.2013. Durada 03:35 minutas.
Or da L'archivar recumonda dals 10.05.2013.

L'asen, in animal cun bleras qualitads

L'asen giauda in veritabel revival. Sia reputaziun sco animal tup e stinà vegn rectifitgada. Ins scuvra ed appreziescha oz ses esser ruassaivel, sia sensibilitad, la prudientscha visavi privels ed anc bler auter.

Ils asens nu sun uschè pluffers sco cha blera glieud craja adüna. Ils asens sun natüral fich intelligiaints e furbers. E sch’il patrun es halt ün pa plü pluffer sco’ls asens (...) lura nu va quai garantì nüglia.
Autur: Chasper Mischol, Vnà
Legenda: Guardar il video Trekking cun asens en Engiadina Bassa e Val Müstair – Telesguard 10.07.2010. Durada 03:21 minutas.
Or da L'archivar recumonda dals 10.07.2010.

Danunder vegnan ils asens tar nus?

Martin Cathomas è sa decidì per ina tratga d'asens en Val Sumvitg. Tge ha motivà el e tge niz pratic porta quai? El ha era rimnà insaquanta experientscha cun lur esser e caracteristicas.

Il martgadant da biestga Gion Rest Derungs da Peiden ha schlargià cun success sia purschida sin asens ord il Tessin. In da ses clients, in pur da Vignogn, sa mussa fitg cuntent cun sia acquisiziun.

Legenda: Guardar il video Commerci da success en Val Lumnezia cun asens dal Tessin – Telesguard 06.12.2011. Durada 02:34 minutas.
Or da L'archivar recumonda dals 06.12.2011.
Tgi che ha giu in tec da far cun igl asen siara el en siu cor.
Autur: Leo Tuorscriptur