La curaisma – la cura per corp ed olma

L’usit sacral da la curaisma exista dapi il quart tschientaner. La baselgia catolica ha introducì la curaisma per imitar ils 40 dis che Jesus ha passentà en il desert. La curaisma duai plinavant regurdar a la passiun ed a la mort da Jesus ed esser la preparaziun sin Pasca.

Nagina tschigulatta e nagin alcohol: il temp da curaisma  Bild in Lightbox öffnen.

Legenda da maletgs: Nagina tschigulatta e nagin alcohol: il temp da curaisma. MAD

Suenter il tschaiver vegn la curaisma

Suenter il tschaiver suonda la curaisma

2:31 min, L'archivar recumonda dals 7.3.1992

La curaisma entschaiva cun la mesemna da la tschendra e finescha da Pasca. La Televisiun Rumantscha aveva filmà il 1992 in servetsch divin en il Grischun Central.

«  Ta regorda carstgaun che ti es pulvra e che ti daventas puspè pulvra. »

Felicissimus
Pader chaputschin

L’usit da curaisma ha pers sia muntada

Tgi desista da magliar tschigulatta, auters desistan da la charn ed intgins na fiman e na baivan nagin alcohol durant la curaisma. En il temp dal individualissem para la curaisma en il senn tradiziunal dentant d'avair pers in pau da sia muntada. Quai mussa ina retschertga ch’era vegnida fatga da la Televisiun Rumantscha il 1994.

La curaisma ha pers sia muntada

9:00 min, L'archivar recumonda dals 27.2.1994

«  Jau na fatsch nagin tschaiver e stoss uschia era betg far curaisma.  »

La stgisa
per betg stuair far curaisma.

La curaisma avant onns

Onna Maria Kressig-Willi, ina dunna da 90 onns da Domat, aveva raquintà ad Agi Fetz en il Radio Rumantsch il 1994 co ch’i vegniva fatg curaisma pli baud. Era en sia auta vegliadetgna fascheva ella anc adina curaisma. Dentant senza desister da la tschigulatta.

«  Jau hai desistì in mais da leger romans en il temp da curaisma.  »

Onna Maria Kressig-Willi (90)

Curaisma oz ed ina giada

Quai era il titel d’ina emissiun dal Radio Rumantsch avant 40 onns. Discutà cun Pieder Simeon davart l’usit da curaisma avevan Ser Jacob Michael (refurmà) e Sur Gion Martin Pelican (catolic).

«  Nagina curaisma, ma nus ans regurdain al patir da Jesus Cristus.  »

Ser Jacob Michael (preditgant)

Sursiglir cuntegn supplementar

Gigina er tar autras religiuns

Dis da gigina ed abstinenza èn era enconuschents tar autras religiuns. Ils Gidieus han il di dal perdun, ils Muslims han il mais dal Ramadan. Ils Catolics entschaivan la curaisma suenter il tschaiver cun la mesemna da la tschendra. Cun metter simbolicamain tschendra sin il chau vegn fatg endament al carstgaun che tut è svanaivel.