Siglir tar il cuntegn

Header

cuntegn

L'archivar recumonda La fluriziun dal rock rumantsch en Surselva

Ils onns 80 dal davos tschientaner nascha il rock rumantsch a Mustér. Gist quatter gruppas en vischnanca fan da quest temp musica da rock cun texts rumantschs.

audio
Mezdi: Archiv - scena da rock a Mustér
ord Actualitad dals 13.01.2017.
laschar ir. Durada: 3 minutas 3 Secundas.

Musica da rock cun identitad rumantscha

Il culp inizial per il rock rumantsch en Surselva ha dà la gruppa Hades l’onn 1983. Suenter avair fatg blers onns musica da saut han ils commembers da Hades decidì da scriver atgnas chanzuns da rock cun text rumantsch. Paucs onns suenter naschan a Mustér gruppas cun la medema intenziun bunamain sco bulieus ord la terra. Gruppas cun nums sco Sigma, Ba-Rock e Caschiel Carnpiertg e Remiedi.

Els han scrit hits sco "Gion Giusep dalla Maria" e "Blues da purs".
Legenda: Caschiel Carnpiertg e Remiedi: Els han scrit hits sco "Gion Giusep dalla Maria" e "Blues da purs". MAD

Hades – il crap da chantun per la scena da rock a Mustér

La gruppa Hades han fatg atgna musica dal 1983 fin il 1993. L’emprim album da studio “Opiniuns” cumpara il 1984. Il 1986 suonda l’album “Sper Via”. Il terz e davos album “Angelina ... ed autras” vegn il 1992 sin fiera. Ils Hades valan sco fullavia dal rock rumantsch en Surselva.

video
Ils pioniers dal rock rumantsch en Surselva: Hades
Or da RTR dals 27.11.1988.
laschar ir. Durada: 1 minuta 33 Secundas.

Caschiel Carnpiertg e Remiedi – cun il blues da purs

Il start han els fatg cun il num Remedy, il tetel d’ina chanzun da la gruppa australiana Rose Tattoo. Ma bain spert mida la gruppa il num en Caschiel Carnpiertg e Remiedi. Zunt critica è la gruppa envers il turissem extravagà. Autras chanzuns descrivan tips sco il Gion Giusep dalla Maria ed il Giacumbert a moda fitg ilarica.

video
Ils caots: Caschiel Carnpiertg e Remiedi
Or da RTR dals 27.11.1988.
laschar ir. Durada: 2 minutas 15 Secundas.

Ba-Rock – la maschaida d’indigens e students claustrals

La gruppa da rock cun ils musicists ils pli giuvens da quest temp a Mustér era Ba-Rock. Probabel la suletta gruppa nua ch’era ils babs e las mammas dals commembers vegnivan a guardar e tadlar ils concerts. Ba-Rock ha pudì edir en sia curta carriera ina platta cun 4 chanzuns.

video
Indigens e students: Ba-Rock
Or da RTR dals 27.11.1988.
laschar ir. Durada: 1 minuta 17 Secundas.

Sigma – la gruppa cun ils 3 frars

La quarta gruppa main enconuschenta da Mustér, Sigma vegn filmada il 1988 en ses tschaler da protecziun cun la chanzun “Larmas en tes egls”. Il plaschair da sunar da Sigma era incontestabel, era sch’els han strusch dumagnà il pass sur ils stgalims da lur tschaler da trenament.

video
Quels dal rock dir: Sigma
Or da RTR dals 27.11.1988.
laschar ir. Durada: 1 minuta 57 Secundas.

Hades surviva il pli ditg

La gruppa da rock rumantsch Hades è stada la gruppa cun la pli gronda perseveranza da la scena da rock ch’è naschia ils onns 80 a Mustér. Onns a la lunga han ils Hades dà concerts en il Grischun, en l’ulteriura Svizra e schizunt sur cunfin. In concert legendar dals Hades è stà quel dal 1988 a Scuol durant la Scuntrada Rumantscha. In concert ch’era vegnì registrà dal Battaporta, l’anteriura emissiun da giuvenils dal Radio Rumantsch.

audio
Hades live 1988 a Scuol
ord RTR Audio dals 11.01.2017.
laschar ir. Durada: 55 minutas 40 Secundas.
Las gruppas da rock rumantschas ston bandunar il Grischun e sa mesirar cun quellas giu la Bassa.
Autur: Elmar Deflorin Anteriur chantadur da Hades

Il start da Gotthard – la fin dal rock en Surselva

Rock Rumantsch

Avrir la box Serrar la box

L'emprim rumantsch ch'ha fatg ina spezia da rock rumantsch è stà Arturo Casanova cun sia chanzun "La ghitara" ils onns 60. Suandà ils onns 70 da Paulin Nuotclà e Benedetto Vigne. La gronda unda dal rock rumantsch è naschida ils onns 80 en Surselva a Mustér cun gist 4 bands. Ils onns 90 sa sparpaglia la scena dal rock rumantsch.

Suenter la fluriziun dal rock rumantsch ils onns 80 en Surselva èsi vegnì pli e pli quiet. Las gruppas ch’eran sa furmadas ord amis e collegas da scola sa schlian ina suenter l’autra. Ils Hades registreschan il 1992 lur davos album. Il medem onn vegn la gruppa da rock dal Tessin Gotthard a la glisch ed edescha l’emprim album cun la reprisa dal hit “Hush”.

Ierta da Hades e Caschiel Carnpiertg e Remiedi

Plirs onns suenter la fin da la scena da rock da Mustér cumparan anc ovras cumplessivas da duas da las anteriuras bands sursilvanas. Caschiel Carnpiertg e Remiedi edescha l’onn 2000 l’album dubel live “Retro”. Dals Hades cumpara il 2015 l’album cumplessiv “L’ovra”.

L'ovra cumplessiva dals Hades sin disc cumpact.
Legenda: L'ovra cumplessiva dals Hades sin disc cumpact. MAD

Artitgels legids il pli savens