Numnasontga
Mintga sontg ha sia chandaila
«Mintga sontg ha sia chandaila» titulescha l'emissiun Scuntrada dal 1. da november 1990. Ella sa fatschenta da rudent dals sontgs.
Tranter auter, per tge ch’els èn «buns» – sco per exempel sontg Antoni che gida, sch’ins ha pers insatge. Dentant era co e daco ch’els vegnan onurads. Tranter auter declera il plevon Gion Martin Pelican, tge funcziun ch’ils sontgs e lur onuraziun han per la baselgia catolica. El fa quai cun ina sauna critica envers il cult da sontgs. A pled vegnan dentant anc autras persunas che sa fatschentan cun sontgs e sontgas.
Discurs cun sora Magdalena e pader Silvio
Tant per sora Magdalena sco era per pader Silvio munta visitar las fossas da mussar l’engraziaivladad envers ils morts, e da sa regurdar dad els.
En il discurs dal 2010 cun Otmar Seiler na raquintan els betg mo da lur tenuta envers il murir ed ils morts, mabain era da lur vita quotidiana sco muniessa e pader.
Di da las olmas
Di da las olmas a Medel, Tujetsch e Mustér
Alfons Maissen è sa fatschentà cun l'istorgia e tradiziun da la Surselva. Tranter auter era da las tradiziuns per ils dis da las olmas a Mustér, Tujetsch e Medel.
En l’emissiun «Sendung für die Rätoromanen» dal november 1962 ha el preschentà las differentas modas da questas trais vischnancas da festivar il di da las olmas.
Il rodel da las olmas da Surrein
A Surrein vegn prelegì anc oz il num dals morts – l'uschenumnà rodel da las olmas – per il di da las olmas. Co che quai tuna e guarda ora, mussa il Telesguard da Numnasontga dal 2005. El mussa plinavant era la passiun da rimnar cartas da morts – il «Sontgs».
Ornar las fossas per Numnasontga ed il di da las olmas
Ornar las fossas per Numnasontga ed il di da las olmas ha gronda tradiziun. Dus exempels èn Mustér e Müstair. Omadus documentads da la Televisiun Rumantscha.
