S'inscuntrar – chantar – star da cumpagnia

Las festas da chant èn ina buna puassaivladad da s'inscuntrar, tgirar il hobi e star da cumpagnia. Quai n'è betg auter tar las Fiastas da cant sursilvanas. Las chanzuns, las impressiuns e las grondas fullas da glieud èn ils cuntegns principals da las contribuziuns da la Televisiun Rumantscha.

Surrein 1970

1970 ha la Fiasta da cant sursilvana gi lieu a Surrein. Il Chor mischedau Surrein ha dà il bainvegni al pievel da festa cun ina chanzun dal cumponist Eduard Lombriser. Conradin Giger, l’autur dal text da la chanzun da bainvegni, è stà da 1950-1992 il dirigent dal Chor mischedau da Surrein.


La festa 1975 ha gì lieu a Lumbrein

4:11 min, L'archivar recumonda dals 1.6.1975

1975: Lumbrein

40 chors èn stads 1975 a Lumbrein - in pievelun ha visità la 36. Fiasta da cant sursilvana. La Televisiun Rumantscha lascha reviver questa festa tranter auter cun «La biala Hermerina», la chanzun generala dals chors maschadads – ina culissa impressiunonta cun in chor gigantic.


Redactur senza vusch a la festa 1988 a Breil

5:48 min, L'archivar recumonda dals 11.6.1988

1988: Breil

Sogn Pieder n'ha betg manegià fitg bain cun ils organisaturs, ils visitaders e cun chantaduras e chantadurs da la Fiasta a Breil. I era fraid, uschè fraid ch'il redactur da la Televisiun Rumantscha ha pers la vusch. La contribuziun mussa bleras chantaduras e chantadurs, era bler chant – il commentari dal redactur da la TR manca dentant daltuttafatg.


Il chor mischedau da Vrin e la festa 1984 a Laax

26 min, L'archivar recumonda dals 15.7.1984

1984: Laax

1984 èn chantaduras e chantadurs sa rimnads a Laax per chantar e star ensemen. La festa da Laax è stada l’emprima cun ina zona da silenzi en ina sala.

La Televisiun Rumantscha ha accumpagnà il chor mischedau da Vrin durant las preparaziuns e durant la festa.

Il Radio Rumantsch ha laschà reviver la festa en l’emissiun «Per la fin dall'jamna»:


2003: Mustér

Avant la Fiasta da cant sursilvana 2003 a Mustér han duas chaussas dà da discurrer: Per l’ina il fatg ch'ins n'ha betg engaschà experts rumantschs, e per l’autra la qualitad da l’accustica en la halla da tennis. Sco quai ch'ils rapports da la Televisiun Rumantscha mussan, èn ils dubis la finala stads nungiustifitgads.

2007 Domat e 2011 Glion

2007 è la Fiasta da cant sursilvana vegnida organisada per l'emprima giada «ordaifer ils cunfins» dal district, quai suenter ch’il Chor viril da Domat era daventà commember dal District da cant Surselva. Per chantaduras e chantadurs dentant nagin problem - els han gudì chant e cumpagnia, exact sco quai ch'els han lura era fatg tar la festa 2011 ch'ha gì lieu a Glion.