Turissem da sanadad da pli baud: ir a far bogn da cura

Turissem da sanadad - quai è in term ch'ins auda bler il davos temp. Turissem da sanadad n'è dentant betg in'invenziun moderna. Pli baud era quai «ir a far bogns da cura» ed il Grischun ha ina gronda tradiziun da tals bogns. Per part datti anc quellas purschidas, per part èn ellas dentant svanidas.

L'aua minerala ed ils bogns da Passugg

5:38 min, L'archivar recumonda dals 27.4.1969

Passugg ha nizzegià gia baud sias funtaunas mineralas. Quai cun porscher bogns, terapias encunter reumatissem e surpaisa. Dentant era cun emplenir l'aua minerala en buttiglias e vender quella.


San Murezzan, Scuol, Tarasp, Vulpera, Val, Mustér ed Andeer: Tut lieus cun bogns da cura - tuts staziun per la visita dal «balcun tort» il 1973 e 1974. Onns ch'il turissem era en ina fasa da midada e plans per il futur. (rem. d+a: deplorablamain n'èsi betg stà pussaivel da curreger ils problems da sincronisaziun)

Curas cun auas mineralas

Dals Romans sur il temp medieval eran funtaunas pitschnas popularas per curas ed era ils medis propagavan quellas. L'emprima guerra mundiala ha lura midà quai in pau ed ils onns 70 dal tschientaner passà hai para puspè dà conjunctur'auta per auas mineralas. Da quai èsi d'udir en l'emissiun per ils malsauns dals 26.10.1972.

Ir a far bogn da cura

Per tge mals èsi inditgà da far bogns da cura e baiver aua minerala? Con bain fai da far bogns? Nua èsi il meglier da far ina da quellas curas?

Quai èn be trais dumondas che vegnan respundidas en l'emissiun per ils vegls dals 28.03.1985. Las respostas vegnan d'in medi, d'ina dunna ch'ha experientscha da far cura e d'in um ch'è stà en differents lieus a far bogns curativs.

Andeer ed il turissem da bogns

Andeer ha ina lunga istorgia sco lieu da bogn da cura. Anc oz van blers a far cura ad Andeer per sa revegnir dad operaziuns e malsognas. 1996 è il Radio Rumantsch stà cun l'emissiun «Bunaluna» in'entira damaun ad Andeer. Las contribuziuns mussan ch'ils pretschs per in'entrada eran auters ch'oz - dentant ch'ils giasts beneventavan gia lura la purschida.