Siglir tar il cuntegn

Header

In'ovra artista da Alesch Vital
Legenda: Il salip da struvas: in'ovra artistica da Alesch Vital RTR
cuntegn

L'archivar recumonda Artists grischuns – Bott, Bundi, Brenn ed auters

Els stattan en pau en la sumbriva dals gronds cun renum internaziunal sco Alois Carigiet u Not Vital. Artistas ed artists grischuns main enconuschents, ma dal tuttafatg era interessants.

Gian e Giuliano Pedretti - frars ed artists

Els èn ils figls dal pictur-artist e graficher Turo Pedretti da Samedan. Gian e Giuliano Pedretti. Il Balcun tort visita 1970 ils dus frars en lur ateliers.

Gian Pedretti, il giuven dals dus frars, sa deditgescha a la pictura artistica. Ses frar Giuliano Pedretti sa metta sin ils fastizs d’Alberto Giacometti cun crear sculpturas asimetricas.

Video
Frars artists Gian e Giuliano Pedretti - Balcun tort 06.12.1970
Or da L'archivar recumonda dals 26.11.2019.
laschar ir

Margaritta Brenn-Demarmels - la multitalentada

Il purtret da la Surmirana Margaritta Brenn-Demarmels mussa la multifariadad da l'artista. Or da cuschas taglia Brenn figuras che fan sgarschur e tema. Ses maletgs sin taila da saida fa ella cun ina tecnica tut speziala. Fenomenalas èn las gravuras en vaider.

Il Balcun Tort ha visità l'artista 1963 en ses atelier a Stierva e mussa insaquantas ovras da Margaritta Brenn-Demarmels.

Video
Purtret Margaritta Brenn-Demarmels - Balcun tort 30.06.1963
Or da L'archivar recumonda dals 26.11.2019.
laschar ir

Not Bott – il sculptur da lain

El creescha cun sia resgia a motor en ses temp liber sculpturas da lain ord cuschas. Not Bott, oriund da la Val Müstair, che viva e lavura en il Puschlav tar las ovras electricas.

La materia primara per sias sculpturas, il schember, va el a tschertgar per ils guauds enturn. L’emissiun Svizra Rumantscha purtretescha 1985 l’artist Not Bott ch’era oriundamain emploià sco guardia da cunfin.

Video
L'artist Not Bott - Svizra Rumantscha 24.03.1985
Or da L'archivar recumonda dals 26.11.2019.
laschar ir

Marc Bundi en l’Africa

L’artist Marc Bundi è fascinà dal element da l’aua. Quai ch’ins ha tar nus en las muntognas en abundanza è per ina gronda part da l’Africa da gronda mancanza.

Il plan da Marc Bundi: crear a moda artistica cun bleras colurs ina tur d’aua a Cartum en il Sudan. La Televisiun rumantscha ha accumpagnà Bundi sin sia missiun.

Video
Marc Bundi en l’Africa - Svizra Rumantscha 18.02.2001
Or da L'archivar recumonda dals 26.11.2019.
laschar ir

Alesch Vital l’agratist

El è creschì si en la Bassa e turnà en la patria da ses antenats a Scuol. Alesch Vital titulescha sa sez sco agratist, ina maschaida da pur ed artist. Sper l’agricultura deditgescha el ina part da ses temp a l'art.

L’emissiun Svizra Rumantscha 2002 mussa co Vital creescha ord metal vegl figuras filigranas da tut gener e co el s’engascha per dumondas da l’ambient.

Video
Alesch Vital l’agratist - Svizra Rumantscha 09.06.2002
Or da L'archivar recumonda dals 26.11.2019.
laschar ir

Roman Plaz – lavurar cun fier

Ses talent da lavurar cun fier ha Roman Plaz ertà da ses tat. Gia sco uffant era el savens cun ses tat en la fravgia. Sco l’emissiun Svizra Rumantscha mussa è ina passiun da Roman Plaz quella da crear cruschs-fossa individualas.

Video
Art da metal da Roman Plaz - Svizra Rumantscha 31.10.2004
Or da L'archivar recumonda dals 26.11.2019.
laschar ir