Pli baud schevan mes geniturs adina la saira dals 31 da mars: damaun è lura l'emprim d'avrigl, betg crai tut quai che vegn detg e na fai betg exnum quai che vegn pretendì da tai senza ponderar.
Il pli è lura capità gist il cuntrari!
En l'archiv da RTR sa chattan intginas perlas per l'emprim d'avrigl.
Peter Hugentobler e ses ippopotam
Ina bella seria ha il Battaporta realisà l'onn 1987. La figura: Peter Hugentobler alias Flurin Caviezel. Il protagonist: Jon Corradin da la vischnanca da Scuol. Il tema: Peter Hugentobler lavura tar il circus Olimpia e tschertga in dormitori per ses ippopotam.
Hugentobler il constructur dad aissas da surf...
En in'autra rolla è Hugentobler constructur dad aissas da surf e less ina vela ord launa biologica. Sia unfrenda. Il signur Casanova da la fabrica da ponn a Trun.
...e sco reschissur da reclama
En quella rolla less Peter Hugentobler dad Ami Conrad da la chava da granit ad Andeer in auto ord granit per in spot da reclama.
Il Telesguard ed ils animals
Quai che dat en egl tar il Telesguard è l'affinitad tar sgnoccas en connex cun animals. Sche quai ha da far cun las paraulas ch'ils redacturs avevan udì sco uffant u cun la fantasia da chatschaders n'è betg cler. Basta: u ch'ins ha vesì in leopard en la Val Sumvitg...
...u che las nursas da Sent èn crappadas perquai ch' ellas avevan mangià il pastg artifizial da la plazza da ballape.
Il pli vegnan las sgnoccas lura schliadas la saira en il Telesguard, uschia era l'onn 2006.
Il Minisguard sa tut
Ed il Minisguard declera danunder che l'emprim d'avrigl vegn insumma.
