Charas aspectaturas, chars auditurs ni charas convischinas e preziads convischins. Uschia cumenzan blers pleds dals politichers ch'èn da chattar en l'archiv da RTR.
Bler temp en las emissiuns da radio
Il Radio Rumantsch ha dà il 1961 il pled al president da la regenza grischuna Georg Brosi. Quel discurra en ses pled il bel dialect dal Partenz e fa allusiun a l'impurtanza dal linguatg matern. I vala la paina da tadlar per udir tge che preoccupava al cumenzament da l'onn 1961 la regenza grischuna.
1972 dat l'emissiun purila da Bumaun il pled a tuts tschintg cussegliers guvernativs. In dad els è Giachen Giusep Casaulta da la Lumnezia che sa drizza cun speranza vers las convischinas che dastgan sperar da survegnir era sin livel chantunal il dretg da votar – il 1971 era quai stà il cas sin livel naziunal e per part communal.
Ina autra dramaturgia hai dà l'onn 1968. Il pled dal president da la regenza Emanuel Huonder vegn introducì cun ils suns dals zains da da ses lieu d'origin Mustér. Emanuel Huonder punctuescha cunzunt ils problems che spetgan e spera sin la solidaritad da mintgin.
Sco capo dil departement da finanzas saiel jeu che tuts che survegnan in quen da taglia sevilan che mo els stoppien pagar. Jeu sun cuntents che tuts sevilan.
La societad aveva da purtar en quels onns gronds burdis.
Trais onns pli tard, il 1971, sa mussa il president da lura, Gieri Vieli, sco persuna positiva ed optimistica.
Pleds uffizials en la televisiun fin ils 1993
Ils onns 80 ha la Televisiun Rumantscha dà il pled als presidents da la regenza en il Telesguard. Quai è daventà tradiziun per intgins onns. Alois Maissen ha elegì l'onn 1993 la stanza da la regenza per far ses pled.
Auters han gì da viver cun il studio e la decoraziun ch'era avant maun da lez temp.
E sch'il Grischun aveva gia in president dal cussegl federal che saveva in zic rumantsch, fissi stà ina vergugna da na laschar vegnir a pled Leon Schlumpf l'onn 1984.
RR actualitad 11:00