Revisiun parziala da la lescha da taglia, centralisaziun e decentralisaziun da plazzas dal chantun, center da sport naziunal a Lai. Quai èn be intgins temas ch'il Cussegl grond ha tractà quest'emna. Forsa che in u l'auter dals cussegliers ha gì lungurella e contemplà pli detagliadamain la pictura vid la paraid da la sala dal Cussegl grond.
Quest maletg ha Alois Carigiet stgaffì 1958-60. Suenter che Carigiet aveva preschentà sia ovra al Cussegl grond, aveva el declarà a Tista Murk tge ponderaziuns ch'el aveva fatg per quell'ovra e tge ch'ella signifitga:
Na betg mo il radio ha rapportà da l'ovra d'Alois Carigiet per la sala dal Cussegl grond. Il maletg è era adina puspè stà tema en contribuziuns da televisiun.
Alpine Artists
La pictura da paraid dal Cussegl grond ha dà da discutar fin en l'Engalterra. Il schaner 1964 ha la BBC emess in film cun il titel «Alpine artists». En quel è tranter auter era il maletg monumental d’Alois Carigiet vegnì preschentà.
Emprima emissiun da colur da la Televisiun svizra
Ils 1 d'october 1968 ha la Televisiun svizra emess l’emprima emissiun televisiva en colur. En quella emissiun è vegnì preschentà in purtret dal pictur artist Alois Carigiet, e tranter auter è era la pictura dal Cussegl grond stada da vesair.
In viadi tier Carigiet - Matias Spescha seregorda
1997 han ils Cuntrasts fatg «in viadi tier Carigiet» ensemen cun ses ami Matias Spescha. Matias Spescha sa regorda da sia collavuraziun cun Carigiet per la pictura dal Cussegl grond.
Noss Carigiet - trais ovras grondas
Il 2015 è la pictura dal Cussegl grond puspè stada tema tar la Televisiun Rumantscha. Numnadamain en l'emprima part da las 3 contribuziuns dal Telesguard cun il titel «Noss Carigiet – trais ovras grondas».