Siglir tar il cuntegn

Header

cuntegn

L'archivar recumonda Dagut a dagut fa bun sitg

L’atun – suenter avair racoltà, fatg vendemia e mess il giuven vin en butschin porscha la natira anc in regal. E quai schizunt or da materia rufid, sco puma crudada u pauc bella ed il trester dal far vin. Per in tal regal procuran ils brischavinars cun destillar pliras sorts da vinars fins.

En l’archiv RTR chattain nus documents che illustreschan l’art da brischar vinars en il Grischun, saja quai a moda e maniera simpla, anc a la veglia, sco er cun indrizs pli moderns che levgeschan la lavur ed optimeschan la producziun. La procedura en sasez n’ha dentant strusch midà dapi la scuverta avant bun milli onns.

Il brischavinars da Fuorns (Val Medel)

Giusep Venzin da Fuorns è renumà tant sco chavacristals sco brischavinars. En in Balcun tort dal 1968 vesain nus el vi da la lavur en ina baita stgira ed isolada a l’ur dal guaud. Il commentari è da Gion Deplazes, autur dal roman «Levzas petras» (1961) che tracta davart in brischavinars da giansauna.

Onns pli tard (2011) raquinta Giusep Venzin a la Televisiun Rumantscha da sias experientschas cun brischar vinars e dals controlladers federals.

Il brischavinars da Schnaus

Sin stgalim pli aut lavura Risch Caspescha da Schnaus. El brischa vinars da tuttas sorts per numerus purs da la regiun. Da november enfin avrigl po quai muntar ad in pèr milli liters. Il rest da l’onn prepara el la blera laina ch’i dovra per destillar e gida ses figl sin il bain puril.

video
Svizra Rumantscha - 31-01-1993
Or da L’archivar recumonda dals 12.11.2019.
laschar ir. Durada: 7 minutas 24 Secundas.

La giansauna – ils secrets dals chavaragischs

Sper il daletg d’in bun sitg po vinars avair effects medicinals. Quai vala oravant tut per vinars or da ragischs da giansauna. En il Grischun vegn per il solit duvrà la giansauna violetta ch'è pulit derasada. L’onn 2006 ha la Televisiun Rumantscha accumpagnà Augustin Candinas da Surrein sin ina tura per chavar ragischs da giansauna.

video
Svizra Rumantscha - 12-11-2006
Or da L’archivar recumonda dals 12.11.2019.
laschar ir. Durada: 7 minutas 43 Secundas.

A Surrein brischan ils Candinas vinars gia en la sisavla generaziun. Sco interpresa spezialisada investeschan els periodicamain en indrizs moderns. E tuttina mantegnan quels in aspect tradiziunal e la maischa vegn vinavant stgaudada cun laina sco noss film dal 2003 mussa.

video
Telesguard - 29-12-2003
Or da L’archivar recumonda dals 12.11.2019.
laschar ir. Durada: 1 minuta 49 Secundas.

La meglra grappa sto vegnir dal sid

Brischavinars n’èn sa chapescha betg mo da chattar en Surselva. L’onn 2016 ha la Televisiun Rumantscha fatg in viadi a Brusio en il Puschlav tar Pietro Misani. Sia grappa, destillada cun in indriz ch'è pli che 100 onns vegl, è gia vegnida premiada sco «meglra grappa svizra».

video
Telesguard - 11-11-2016
Or da L’archivar recumonda dals 12.11.2019.
laschar ir. Durada: 2 minutas 59 Secundas.

RR Archivar recumonda 11:00

Artitgels legids il pli savens