Uniun cun lunga tradiziun
La Societad da schumbraders Domat, il num uffizial «Tambourenverein Domat/Ems», è vegnida fundada 1931 ed è enconuschenta lunsch sur ils cunfins chantunals. Adina puspè va la societad tar concurrenzas chantunalas e federalas per arbajas. A las concurrenzas vegn schumbrà singul sco era en secziun. Ina cronica «1931-2008» documentescha la lunga tradiziun dals tamburs da Domat.
Exercizi senza misericordia
Il balcun tort da la Televisiun Rumantscha ha realisà 1971 in purtret dals schumbraders da Domat. En il focus stat l’exercizi che pretenda ina enorma disciplina. Mo cun perseveranza po la gruppa ascender l’olimp dals megliers tamburs en Svizra.
Campiuns svizzers
L’onn 1974 daventan ils tamburs da Domat per l’emprima giada campiuns svizzers en la categoria A da las secziuns. La paja per ina perseveranza onns a la lunga. Era ils onns 1978, 1994 e 1998 è la Societad da schumbraders da Domat la meglra gruppa da tamburs en Svizra.
L’onn 1978 a la festa federala a Wil avain nus strusch cartì: nus essan turnads a chasa per la segunda giada sco campiuns svizzers.
Schumbrar per il papa
Blers tamburs da Domat han fatg servetsch en la Guardia papala a Roma. Per render onur a quest servetsch ha la Societad da schumbraders da Domat survegnì 1979 in invit da Roma. Els han pudì sa preschentar avant la Guardia papala. Da la partida ad in concert è era il papa Gion Paul II stà. Il balcun tort ha filmà l’eveniment extraordinari.
Festas da baselgia
La participaziun a concurrenzas da tamburs èn mo ina vart da la societad. L’uniun ha ina lunga tradiziun en la vischnanca da Domat. Adina preschents èn ils tamburs a las festas ecclesiasticas. Quai mussa in purtret da la societad ch’era vegnì realisà 1982 da Svizra Rumantscha.
La 18avla festa da tamburs da la Svizra Orientala
Mintg’onn vegn organisà en la Svizra Orientala ina festa da tamburs. Las festas vegnan mintgamai organisadas en ils lieus d’origin da las societads. L’onn 1997 ha il Telesguard rapportà da la festa da tamburs da la Svizra Orientala ch’è stada a Domat.
Il giubileum da 75 onns dals tamburs da Domat
L’onn 2006 festivescha la Societad da schumbraders Domat il giubileum da 75 onns. En ina contribuziun da Telesguard era il dirigent veteran Franz Willi sa regurdà da ses tat ch’era stà tranter ils fundaturs da la societad.
Il tamburs ed il tschaiver
Sper las concurrenzas da tamburs e las festas da baselgia ha la Societad da schumbraders Domat anc in’ulteriura passiun: far part al til da bagordas. Quai è ina obligaziun per ils tamburs en la vischnanca da Domat che vala sco metropola dal tschaiver en il Grischun. L’emissiun Minisguard ha accumpagnà 2012 ils giuvens tamburs da Domat durant las emprovas musicalas per il tschaiver.
La promoziun permanenta da giuvens tamburs
Per ch’ina uniun possia exister sur pliras generaziuns sto adina nova glieud giuvna vegnir recrutada. Tar la Societad da schumbraders Domat vegn dà gronda paisa da trair suenter novs tamburs giuvens che sa mettan en ils stadals dals pli vegls che bandunan baud u tard la societad. Il Minisguard ha visità il 2016 ina emprova cun ils giuvens tamburs.
La concurrenza da Domat: la Societad da tamburs da Rabius
Onns a la lunga hai dà sper Domat ina segunda ferma gruppa da tamburs en il Grischun. La Societad da tamburs da Rabius. Pervia da mancanza da manaders e da schumbraders è la societad vegnida schliada.
La festa da tamburs da la Svizra Orientala era vegnida organisada il 1987 a Rabius. Il Telesguard da la Televisiun Rumantscha aveva rapportà d'in tambur da Rabius ch'aveva gudagnà la concurrenza en la categoria dals giuvens tamburs. En la categoria da las secziuns era Mustér ì cun la plima, piz a cup avant ils tamburs da Domat.
