Siglir tar il cuntegn

Header

cuntegn

L'archivar recumonda Segar a la veglia u betg?

Segar è bler dapli che spira necessitad magari stentusa. Sco occupaziun impurtanta dals purs ha ella gia baud sviluppà guaffens e cundrizs ingenius, e la buna tecnica per duvrar quels. A sias uras era schizunt la mudesta fautsch high-tech sco oz ina maschina da segar telecumandada.

La fautsch

Ina giada in dils guaffens pli impurtants dal pur. Enconuschenta en nossas regiuns silmain dapi il temp da fier vegniva ella duvrada stediamain enfin ils onns 1950. Malgrà la mecanisaziun exista ella segir anc oz sin mintga bain puril, sco relict u per segar anc qua e là nua che la maschina na po betg vitiers.

Mo tgi da nus, auter che forsa ils vegls, ha anc in’idea da la gronda varietad da fautschs che han existì en Europa e perfin en Svizra? E da las qualitads specificas ch’èn colliadas cun la fabricaziun e furma da plat e schilun?

I dat anc persunas passiunadas dal segar cun la fautsch. En in’emissiun Svizra rumantscha dal 2008 tradeschan purs ed ina pura, da l’Engiadina e da la Surselva, lur savida ed experientscha. Per la ritgezza infurmativa ed illustrativa davart la fautsch represchenta quest film da Bertilla Giossi in veritabel entruidament al segar, gizzar e batter cun savida, tschaffen e gust.

video
Segar, gizzar, batter - in omagi a la fautsch
Or da L’archivar recumonda dals 21.09.2008.
laschar ir. Durada: 24 minutas 31 Secundas.

La maschina

Igl è in pass enorm. Suenter pli che 2000 onns penetrescha l’actuala mecatronica en l’anteriura domena da la fautsch. Schebain mussada en in Telesguard d’avant plirs onns (2010) resta questa tecnologia avanzada en nossas cuntradas franc anc in temp l’excepziun.

video
Maschina da segar telecumandada
Or da L’archivar recumonda dals 28.06.2010.
laschar ir. Durada: 1 minuta 26 Secundas.

Ed ozendi, segar ord vista sportiva?

audio
Alternativa sportiva sin il prà
ord RTR Audio dals 16.08.2017.
laschar ir. Durada: 1 minuta 50 Secundas.

Tut auter che mo stenta e fadia, il far fain a la veglia cun fautsch, furtga e rastè... La giuvna Sursilvana Silvana Derungs scuvra il potenzial da fitness tant corporala sco mentala che sa porscha al valent prader. (Impuls dals 18.5.2011)

RR actualitad 11:00

Artitgels legids il pli savens