Siglir tar il cuntegn

Header

Navigaziun

Legenda: Tadlar il audio Mezdi: L'archivar recumonda – «Tant per oz. Enavos a Cuira!». Durada 04:52 minutas.
04:52 min, Actualitad dals 19.02.2019.
cuntegn

L'archivar recumonda «Tant per oz da Berna. Enavos a Cuira!»

L'atun 2019 vegn il parlament federal a Berna elegì. Ils onns 80 stuevan ils elegids betg mo savair far politica – els rapportavan era per il Radio Rumantsch da l'atgna lavur. In archivar recumonda cun tuns da radio cura ch'ils politichers faschevan da reporter.

Oz na pon ins betg s'imaginar quella situaziun: il cusseglier naziunal Duri Campell survegn l'incumbensa da rapportar per il Radio Rumantsch da quai ch'il cussegl naziunal ha discutà e decidì en la sessiun actuala. In politicher sco reporter – quai na va oz da principi betg, almain per la SSR.

Il cumenzament dals onns 80 era quai dentant la regla tar il Radio Rumantsch. Igl è da metter quai en il context dal temp: il radio aveva nagins correspundents a Berna, trametter insatgi spezialmain per ina tractanda na vegniva betg en dumonda. Perquai la schliaziun pragmatica da lezzas uras: dar il microfon ad ins dals parlamentaris rumantschs.

Nova lescha dal parc naziunal

Il cusseglier naziunal da la PS Martin Bundi rapporta il december 1980 d'ina nova lescha per il parc naziunal svizzer. Gia da lezzas uras era il dumber da tschiervs in tema. A la fin da ses rapport vai per la finanziaziun da las minoritads linguisticas en Svizra.

Subvenziuns

Il cusseglier naziunal Toni Cantieni da la PCD sa concentrescha en ses rapport dal 1981 sin las subvenziuns per la Lia rumantscha e la Pro Grigioni Italiano.

Bancas e taglias

Sur d'ina decisiun sensaziunala en connex cun taglias e bancas rapporta il cusseglier naziunal da la PCD Dumeni Columberg la stad 1981.

1982 vai puspè per contribuziuns finanzialas – quella giada per las trais plazzas aviaticas a Turitg, Basilea e Genevra.

Elecziuns ed emoziuns

Ed uschia tunava l'emissiun da novitads dal Radio Rumantsch il 1984 suenter l'elecziun dal president dal cussegl naziunal Arnold Koller, vicepresident daventa Martin Bundi.

Regiuns da muntogna

Las regiuns da muntogna stevan adina puspè en il center dals rapports dals parlamentaris rumantschs.

Contracts bilaterals

Mintgatant dastgava er in cusseglier dals chantuns rapportar. L'onn 1984 è quai stà Franco Matossi che seseva per il chantun Turgovia en la chombra pitschna. Ses tema principal: contracts bilaterals cun ils vischins da la Svizra.

E finì ha el sco i vegn chalà oz en emissiuns d'actualitad: «Tant per oz!»

RR actualitad 11:00