Ils emprims 6 mais da quest onn èsi vegnì investì marcantamain dapli daners en start-ups svizzers. Cumpareglià cun l'onn passà è il volumen creschì per 46%. Quai mussa ina analisa da la societad da cussegliaziun Ernst & Young.
Basilea figurescha sco emprima citad svizra da la rangaziun mundiala sin plazza 8. Quai cun in volumen d'investiziuns da 203 milliuns euros, Turitg suonda sin plazza 16 cun 117 milliuns e épsamma sin plazza 20 cun 97 milliuns.

Paris surpassa Berlin

Il pli bler èsi vegnì investì a Londra. Malgrà las malsegirezzas pervia dal Brexit han ils start-ups da Londra ramassà 5,7 milliardas d'investiders. Sin plazza dus suonda la chapitala franzosa Paris cun 2,2 milliardas euros. Paris ha en cumparaziun cun l'onn passà uss pudì surpassar Berlin. Quai er grazia a la politica da la Frantscha. Il president da la Frantscha Emmanuel Macron ha la finamira ch'il pajais daventa la plazza per start-ups en l'Europa.

RR novitads 12:00