Il quint è simpel: Entant che l'allianza cotschen-verda ha gudagnà 4,1% vuschs tar las elecziuns naziunalas - ha la dretga pers 5,1%. Ina tala midada n'hai anc mai dà en l'istorgia svizra dapi l'introducziun dal sistem da proporz l'onn 1919.

RTR

La raschun èn surtut duas gruppas d'electuras ed electurs: Quels che han dastgà eleger per l'emprima giada e quels che n'han betg elegì avant 4 onns. Tar omaduas gruppas gudogna la Partida verda - entant che la PPS perda.

RTR

E la giuventetgna ha elegì per gronda part verd: 21% da las electuras e dals electurs tranter 18 e 25 onns han elegì la Partida verda. Sin posiziun dus suonda la PPS e gia sin plazza trais la Partida verd-liberala cun 14%. Verd e Verd-liberal è pia trumf tar la giuventetgna - entant che las partidas che han pers vuschs (la PPS e la PS) han electuras ed electurs plitost pli vegls.

RTR

Colur verda era en il Cussegl federal?

60% da las persunas dumandadas èn da l'avis che la Partida verda (ubain la Partida verd-liberala) duai survegnir in sez en il Cussegl federal. Interessant è surtut l'opiniun da persunas che vuschan burgais: Ina maioritad da 55% che vuschan per la Partida cristiandemocratica (PCD) giavischa ina represchentanza ord il spectrum ecologic en il Cussegl federal. Era 48% da la Partida liberaldemocratica (PLD) èn da quest avis.

Dentant: Sin donn e cust da tgi? Qua giogan las preferientschas politicas puspè ina rolla. Tuttina èn 27% da l'avis che la PLD stoppia desister d'in sez. Actualmain represchentan Karin Keller-Sutter ed Ignazio Cassis ils liberals.

Audio abspielen
03:08
Ils motivs per il stausch a la sanestra
Da Actualitad dals 21.10.2019

RR novitads 17.00

La retschertga da Sotomo

Fatg la retschertga ha l'institut Sotomo sin incumbensa da la SRG SSR. I sa tracta d'ina retschertga online dals 18 enfin ils 21 d'october 2019 - cun participaziun da 20'645 persunas.

Las dumondas davart la cumposiziun dal Cussegl federal ha Sotomo publitgà pir suenter l'emprima calculaziun naziunala, dumengia ils 20 d'october a las 16:00 uras. Perquai èn resguardadas per questa part 4'194 persunas.