Tranter auter ha la polizia annunzià d'augmentar la preschientscha al lieu. Per na betg disturbar las retschertgas che duran anc, na dettia il mument betg dapli infurmaziuns. La procura publica responsabla Muri-Bremgarten ha instradà ina inquisiziun.

Entaifer l'emna passada hai brischà trais giadas a Merenschwand: Il venderdi ha ina chasa d'ina famiglia brischà. In fieu haja dà en la garascha ed in segund en il tschaler. Il glindesdi saira han ils pumpiers stuì ir a la lavur perquai ch'in banc ed in clavà vegl han brischà. E la dumengia passada han flommas destruì in'anteriura chasa da purs cun il clavà.

Seria dad otg incendis

La seria d'incendis ha gia cumenzà la stad. Dapi lura hai brischà tut en tut otg giadas. Tranter auter han il pumpiers pudì impedir il mez avust in incendi grond en ina fabrica da chistas. In di pli tard è ina saiv viva da tujas stada en flommas ed anc la medema notg è la chamona da guaud brischada dal tuttafatg.

Dus dis pli tard ha la polizia prendì en fermanza duas persunas ch'han dat tiers d'avair mess ils fieus. In um da 22 onns ed ina giuvna da 17 onns. L'entschatta november ha l'um pudì bandunar l'arrest d'inquisiziun. Tenor la procura publica na dettia naginas indicaziuns ch'el saja responsabel per ils fieus da l'ultima emna. Sch'i dat in connex tranter ils incendis da l'avust e quels da l'emna passada sto anc vegnir sclerì definitiv. Per la giuvna da 17 onns è la procura per giuvenils responsabla.

Ord l'archiv

Audio abspielen
01:15
Gibt es einen Zusammenhang zwischen den Brandserien?
Da Regionaljournal Aargau Solothurn dals 03.12.2019

RTR novitads 14:00